समायोजन खबर खोटाङ,
जिल्ला अदालत खोटाङले खेत तथा कुलोलाई असर पुग्ने गरी सुरु गरिएको सडक निर्माणको काम रोक्न अन्तरिम आदेश दिएको छ । अदालतले खोटेहाङ गाउँपालिका–७ लिच्कीराम्चेस्थित रुम्दु–पिप्ले–फोक्सिङटार सडक निर्माणको काम आगामी माघ २९ गतेसम्मका लागि यथास्थितिमा रोक्न अन्तरिम आदेश दिएको श्रेष्तेदार लालबहादुर कार्कीले बताउनुभयो ।

सावा खोला किनारको खेत र कुलो विनास गर्नेगरी डोजर लगाएर सडक निर्माण सुरु गरिएको भन्दै माघ २० गते निषेधाज्ञाका लागि चार जग्गाधनीको मुद्दा दायर भएपछि अदालतको यस्तो आन्तरिम आदेश आएको हो । माघ २९ गते दुवैपक्षलाई बोलाएर छलफल गराउने र सडक निर्माणको काम यथास्थितिमा रोक्ने वा अघि बढाउने टुङ्गो लगाइने अदालतले जनाएको छ । बराहपोखरी गाउँपालिका–१ बराहपोखरीतर्फबाट माघ ७ गतेदेखि सडक निर्माणको काम सुरु गरिएपछि जग्गाधनी निषेधाज्ञाका लागि अदालत पुगेका हुन् ।
२०७५ माघ २४ गते दिउसो २ : ०३ मा प्रकाशित