समायोजन खबर खोटाङ,
खोटाङको दिक्तेल रुपाकोट मझुवागढी नगरपालिकाले बाँदर नियन्त्रणको काम शुरु गरेको छ । किसानहरुले खेतबारीमा लगाएको अन्नबाली तथा फलफुल खेतीलगायतका बालीनालीसखाप बनाएर हैरान पारेको बाँदरलाई भारतीय पेसेवार शिकारीमार्फत समातेर राष्ट्रिय निकुञ्ज पु-याउने तयारी गरेको हो ।

यसका लागि भारत खुसीनगर उत्तरप्रदेशका मुखतार खान शिकारी र साविर खान शिकारीलाई दिक्तेल आएका छन् । बाँदर नियन्त्रणका लागि बाँदर व्यवस्थापन समितिलाई नगरपालिकाले हिजो पाँच लाख रुपैयाँ बजेट उपलब्ध गराएको छ । प्रतिगोटा दुई हजारका दरले २ सय ५० वटा बाँदर समातेर निकुञ्जसम्म पु-याई छाड्नका लागि नगरपालिकाले उक्त बजेट उपलब्ध गराएको दिक्तेल रुपाकोट मझुवागढी नगरपालिकाका नगरप्रमुख दिपनारायण रिजालले बताउनुभयो । नगरप्रमुख रिजालले बाँदर नियन्त्रणका लागि रकम अभाव भएमा थप रकम समेत नगरले व्यबस्था गर्ने उहाँको भनाइ छ ।
२०७५ माघ २४ गते दिउसो १ : ५४ मा प्रकाशित