समायोजन खबर काठमाण्डौ,
सरकार विरुद्ध प्रदर्शनमा उत्रिएका नेपाल विद्यार्थी संघ नेविसंघका अध्यक्ष नैनसिंह महरसहित ६ जना विद्यार्थी नेताहरु पक्राउ परेका छन् । आज नेबिसघंका अध्यक्षसहित ६ जना विद्यार्थी नेताहरुलाई प्रहरीले काठमाडौबाट पक्राउ गरेको हो ।

नेविसंघ पोखराका कार्यकर्तालाई प्रहरी प्रशासनले झूटा मुद्दा लगाएको भन्दै प्रदर्शनमा उत्रिएका महर, उपसभापति नवीन राई लगायत ६ जनालाई प्रहरीले आज दिउँसो बानेश्वरबाट पक्राउ गरेको नेविसंघ केन्द्रीय सदस्य सुशील भट्टले जानकारी दिनुभयो । गत शनिबार नेविसंघले पोखरामा सरकारी गाडीमाथि आगजनी गरेका थिए ।

सरकारी गाडी जलाउन संलग्न रहेको भन्दै नेविसंघका पाँचजना पक्राउ परेका छन् । उनीहरूको रिहाइको माग गर्दै प्रदर्शन गर्दा महर पक्राउ परेका हुन् । नेविसंघले मुलुकमा बढ्दै गएको हत्या, हिंसा, बलात्कार, भ्रष्टाचार, महंगी रोक्न वर्तमान सरकार असक्षम भएको भन्दै सरकार विरुद्ध आन्दोलन गर्दै आएको छ ।
२०७५ माघ २२ गते साँझ ७ : ३५ मा प्रकाशित