समायोजन खबर काठमाण्डौ,
प्रधानमन्त्री केपी शर्मा ओलीले विका सनिर्माणका काममा कुनै समस्या देखिए तत्काल समाधान गर्ने बताउनुभएको छ । विगतमा जे भए पनि अब विकास निर्माणका काममा कुनै समस्या आउन नदिने उहाँले बताउनुभयो । आज चिनिया सरकारको सहयोगमा निर्मित कोटेश्वर–कलंकी सडक हस्तान्तरण समारोहमा उहाँले विकास निर्माणमा कुनै समस्या देखिए आफू चुप बस्न नसक्ने बताउनुभयो । कलंकी–कोटेश्वर सडक निर्माणमा विभिन्न समस्याका कारण भएको ढिलाइप्रति आफू दुखी भएको पनि प्रधानमन्त्री ओलीको भनाइ छ ।

नेपाल–चीन सम्बन्ध विश्वकै दुर्लभमध्येको एक भएको धारणा राख्दै दुई देशबीच पछिल्लो समय सम्बन्ध अझ सुमधुर हुँदै गएको प्रधानमन्त्री ओलीले धारणा राख्नुभयो । सन् २०१६ मा भएको आफ्नो भ्रमणपछि नेपाल–चीनबीचको सुमधुर सम्बन्धलाई नयाँ उचाईमा पु-याएको उहाँको दावी छ । कार्यक्रममा नेपालका लागि चिनियाँ राजदूत हु यांकीले विभिन्न समस्याका कारण कलंकी–कोटेश्वर सडक निर्माणमा केही ढिलाइ भएको बताउनुभयो । राजदूत यांकीले नाकाबन्दी, इन्धन अभाव लगायतका कारण केही समस्या भएकाले ढिलाइ भएको बताउनुभयो । तर सांघाई कन्स्ट्रक्सन ग्रुप अफ कम्पनीले लगातार काम गरी निर्माण सम्पन्न गरेर आज नेपाल सरकारलाई बुझाउन पाएकोमा अत्यन्तै हर्षित भएको उहाँको भनाइ थियो ।
२०७५ माघ १४ गते साँझ ५ : ५० मा प्रकाशित