चिसाङ शेर्पा खोटाङ,
खोटाङको रावाबेंशी गाउँपालिकामा ज्येष्ठ नागरिकहरुलाई परिचयपत्र वितरण गरिएको छ । राज्यले तोकेको नीति नियम अनुसार सेवा सुविधा दिलाउनका लागि गाउँपालिकाभरीका ७ सय ९८ जना बृद्धबृद्धालाई ज्येष्ठ नागरिक परिचयपत्र वितरण गरिएको हो । गएको बुधबारदेखी वडा वडामा गइ बाँड्न थालिएको ज्येष्ठ नागरिक परिचयत्र सोमबारसम्म तिवरण गरिएको हो । गाउँपालिकाको तीन लाख बजेटमा डुम्रे धारापानीमा १६७, दुवेकोलमा ७५, हौंचुरमा १६९, कुभिण्डेमा १२९, खार्पामा १४४ र लामडिाँडामा ११४ जनालाई ज्येष्ठ नागरिक परिचयपत्र वितरण गरिएको गाउँपालिकाका कर्मचारी नर बहादुर श्रेष्ठले जानकारी दिए । भौगोलिक हिसाबले लामिडाँडाको तिर्पामा भने, भोली वितरण गरिनेछ ।

गत माघ ९ गते डुम्रेधारापानीवाट वितरण सुरु गरिएको ज्येष्ठ नागरिक परिचयपत्र वितरणको काम मंगलबार सकिनेछ । परिचयपत्र लिन छुटेकाले भने गाउँपालिकादेखी लिन सकिने व्यवस्था गरिएको गाउँपालिकाले जनाएको छ । ज्येष्ठ नागरिक परिचयपत्र वितरण गरेर औषधी उपचारमा सहुलियत, सार्वजनिक यातायातमा छुट लगायतका राज्यले तोकेको सुविधा पाउने वातावरण वनाइएको गाउँपालिका अध्यक्ष लिलानाथ निरौलाले बताए । यस्तै, गाउँपालिकाले आगामी बुधबारदेखी सोमबारसम्म ६ वडामा अपांगता परिचयपत्र वितरण गर्दैछ । माघ १६ गते लामिडाँडा, १७ गते खार्पा, १८ गते कुभिण्डे, १९ गते हौंचुर, २० गते दुवेकोल र २१ गते डुम्रेधारापानी अपांगता परिचयपत्र वितरण गर्नेछ । अपांगताको हकमा रातो परिचयपत्र पाउनेले मासिक २ हजार र निलो परिचयपत्र पाउनेले मासिक ६ सयका दरले भत्ता पाउनेछन् ।
२०७५ माघ १४ गते साँझ ५  : २५ मा प्रकाशित