समायोजन खबर खोटाङ,
अनाधिकृत रुपमा सामान बिक्री बितरण गरिरहेका २५ जना व्यवसायीलाई ५ दिनभित्र जिल्ला प्रशासन कार्यालय दिक्तेलमा उपस्थित हुन पत्र काटिएको छ । आईतबार हलेसी तुवाचुङ नगरपालिका–७ महादेवस्थान हलेसीमा गरिएको बजार अनुगमनका क्रममा व्यवसाय दर्ता प्रमाण–पत्र नभएका, म्याद नाघेका उपभोग्य सामान बिक्री गरिरहेका, अन्तशुल्क नविकरण नगराएका र अनाधिकृत रुपमा सामान बिक्री बितरण गरिरहेका ति व्यवसायीलाई पत्र काटिएको हो ।

हलेसी बजारमा म्याद गुज्रेका र अनाधिकृतरुपमा बिक्रीमा राखिएका ३० हजार बराबरको उपभोग्य सामग्री जफत गरिएको छ । नजिकिँदै गरेको दशैं तिहारको समयमा हुन सक्ने मूल्य बृद्धि, कालोबजार, कृत्रिम अभाव लगायतका समस्या न्यूनीकरणका लागि हलेसी तुवाचुङ नगरपालिका–७ महादेबस्थानको हलेसीमा आईतबार गरिएको बजार अनुगमनकाक्रममा म्याद नाघेका ११ बोरा उपभोग्य सामग्री जफत गरिएको सहायक प्रमुख जिल्ला अधिकारी एबं बजार अनुगमन समितिका संयोजक सन्तोष सुबेदीले बताए ।

बजार अनुमनकाक्रममा एक भाँडाकुँडा व्यवसायीले अनाधिकृतरुपमा पेट्रोलको मात्रा घटाएर मिनरल वाटरको बोत्तलमा बिक्रीमा राखिएको पाइएपछि पेट्रोल सिज गरिएको छ । हलेसी अधिकांश पशलमा मूल्या सूची नराखेको, दर्ता नगरी व्यवसाय सञ्चालन गरिरहेको, अन्तशुल्क दर्ता नगरी रक्सी र सुर्तीजन्य पदार्थ बिक्री गरिरहेको पाइएको अनुगमन टोलीले जनाएको छ ।
२०७५ असोज २२ मध्यान्ह २ : ०६ मा प्रकाशित