चिसाङ शेर्पा खोटाङ,
जिल्लामा प्रसारित विधुत लाईनको ८ हजार काठको पोल फेर्नुपर्ने भएको छ । नियमित विधुत प्रवाह नहुनुमा मुख्य समस्याको जड काठेपोल भएकाले अनिवार्य फेर्नुपर्ने भएको हो ।

प्राधिकरणको बुईपा सवस्टेशनदेखी ११ केभी लाईन र ट्रान्सफर्मरबाट वितरण गरिएको एलटी लाइनहरुमा राखिएको काठका पोलहरु तत्काल फेर्नुपर्ने अवस्था रहेको नेपाल बिधुत प्राधिकरण वितरण केन्द्र दिक्तेलका प्रमुख नारायण प्रसाद चौधरीले बताए । काठको पोलमा फलामे पोल राख्नलाई १८ करोड ९९ लाख बजेट लाग्ने उहाँको भनाई छ ।

जिल्लामा नियमित विधुत प्रवाह गराउनका लागि काठेपोल हटाउनै पर्ने बाध्यता भएकाले ८ हजार काठेपोल हटाई फलामे पोल राख्नलाई बिधुत प्राधिकरण वितरण केन्द्र दिक्तेलले केन्द्रिय कार्यालयलाई प्रस्ताव गरीसकेको छ । जिल्लामा २०५७ सालबाट बल्न थालेको बिधुत हाल साविकका ३९ गाविसमा बलिरहेको छ ।

भौगोलिक विकटता, सडकको असुविधा रहेको जिल्लाका अधिकांश स्थानहरुमा काठको पोल भएकाले वेला वेलामा ढल्ने, मक्कने, भाँचिने समस्याले नियमित विधुत प्रसारणमा समस्या आउने गरेको छ । उदयपुरको जलजले सव स्टेशनबाट बुईपा सव स्टेशनसम्मको ७० किलोमिटर दुरीको बाटोमा पनि बेलाबेलामा रुख ढल्ने, पहिरो जाने समस्याले नियमित विधुत प्रवाह हुन सकेको छैन ।

यद्यपी, उदयपुरको जलजले सव स्टेशनबाट बुईपा सव स्टेशनसम्मको ३३ केभी लाईनलाई प्राधिकरणले हाल मर्मत गरीरहेको छ । लामो दुरी र जंगलको वाटो हुंदै आएको लाईनमा पिन इन्सुलेटर, डिक्स इन्सुलेटर, तार, च्यानल, जम्पर मर्मत गरीरहेको छ । भाँचिएका पोल फेर्ने, डिस कनेक्ट स्वीच राख्ने काम पनि एकैसाथ भइरहेको छ । मर्मत कार्य भएकाले प्राधिकरणले दिउँसोको समयमा विधुत कटौती गरी साँझमा मात्रै विधुत दिदै आएको छ । मर्मत कार्य दश दिनमा सकिने र नियमित विधुत प्रवाह हुने प्राधिकरणले जनाएको छ ।

विधुत नियमित नआउदा सरकारी, गैह्र सरकारी कार्यालयगत कामकाज, वित्तिय संस्था, साना उधोग र बिशेषगरी जिल्लामा रहेको दुइ सामुदायिक रेडियो, पत्रपत्रिका, अनलाईन सञ्चालन गर्न समस्या भएको छ ।
२०७५ साउन ३० गते साँझ ७ : १६ मा प्रकाशित