समायोजन खबर खोटाङ,

साढे ६ केजी अवैध गाँजा सहित एक महिलालाई प्रहरीले पक्राउ गरेको छ । भोजपुर नगरपालिका–१० भैँसीपंखा धाराटारकी ६४ वर्षीया कोमलशोभा राईलाई अवैध गाँजाको कारोबार गरिरहेका अवस्थामा जिल्ला प्रहरीले बुधबार पक्राउ गरेको हो । राईले केही समयदेखि गाँजा उत्पादन तथा बिक्री वितरण गरिरहेको भन्ने विशेष सुराकीको आधारमा उनको घर खानतलासी गर्ने क्रममा उक्त गाँजा फेला परेको
प्रहरीले जनाएको छ ।

बुइकल तलामा बोराभित्र गाँजा लुकाएर राखिएको अवस्थामा भेटिएको थियो । बिक्रीवितरणका लागि राखिएको उक्त गाँजाका साथै प्रहरीले राईको १४ रोपनी क्षेत्रफल मकैबारीमा रहेको एक सय २ बोट र उनका छिमेकी ६२ वर्षीय दिलकुमार राईको १३ रोपनी क्षेत्रफल मकैबारीमा लगाएको ८४ बोट गाँजा समेत नष्ट गरेको जिल्ला प्रहरी कार्यालय भोजपुरका डिएसपी केशवकुमार थेबेले जानकारी दिनुभयो । पक्राउ परेकी राईलाई अवैध गाजा बेचबिखन गरेको आरोपमा कानुनी कारवाहीको  प्रक्रिया अगाडि बढाएको डिएसपी थेबेले बताउनुभयो ।

२०७५ साउन १७ गते दिउँसो २: ०० मा प्रकाशित