चिसाङ शेर्पा खोटाङ,
खोटाङको दिप्रुङ चुईचुम्मा गाउँपालिकामा ईन्टरनेट जडानको काम अन्तिम चरणमा पुगेको छ । गाउँपालिकालाई सञ्चारसँग नजिक र दैनिक कामकाज गर्नमा सहजताका लागि गाउँपालिकाले ईन्टरनेट जडानको काम समापन विन्दुमा पु¥याएको हो ।

भर्चुवल नेटवर्क प्रालिसँगको साझेदारीमा बढीमा दुईदिनमा गाउँपालिकाको ७ वटै वडामा ईन्टरनेट सुचारु गर्ने लक्ष्य रहेको दिप्रुङ चुईचुम्मा गाउँपालिकाका आइटी अफिसर मणिचन्द्र राईले जानकारी दिए । गाउँपालिका भवनमा १ एमविपिएस र वडाहरुमा ५ सय १२ केविपिएस क्षमताको इन्टरनेट जडान गरिने उहाँको भनाई छ ।

दिप्रुङ चुईचुम्मा गाउँपालिकाको लागि उदयपुरको रौतादेबीमा भएको डिभाइसदेखी हलेसी तुवाचुङ नगरपालिका–११ राजापानीमा रहेको रिपीटर टावरमा कनेक्सन गरी त्यहाँबाट सिधा याङसोलाटारमा रहेको टावरसँग कनेक्सन गराइएको भर्चुवल नेटवर्क प्रालिले जनाएको छ । शुक्रबारसम्म गाउँपालिका भवन र डाडाँगाउमा नेट जडान गरि सकिएको छ । आगामी आईतबारभित्र गाउँपालिकाको सबै वडामा ईन्टरनेट सुचारु गरिने आइटी अफिसर राईले बताए ।

यता साकेला गाउँपालिकामा पनि ईन्टरनेट जडानको काम लगभग सकिएको छ । भर्चुवल नेटवर्क प्रालिले मानेभन्ज्याङ डाडाँमा टावर राखेर फाईभरको कामको अलवा अन्य प्राविधिक, भौतिक काम सम्पन्न गरेको साकेला गाउँपालिका प्रमुख अर्जुन कुमार खड्काले बताए ।

गाउँपालिकाको ८ लाख लगानीमा ईन्टरनेटको काम थालेको प्रालिले मानेभन्ज्याङदेखी खिदिमासम्म ६ किलोमिटर फाईबरको काम धमाधम गरीरहेको छ । खिदिमासम्म पु¥याउन बाँस तथा रुखको खम्बा प्रयोग गरी तार टाँग्ने काम भइरहेको भर्चुवल नेटवर्क प्रालि खोटाङका प्रतिनिधि कमल राईले जानकारी दिए । गाउँपालिका भवनमा १ एमविपिएस र वडा कार्यालयहरुमा २ सय ५६ देखी ५ सय १२ केविपिएसको ईन्टरनेट जडान गरिने जनाईएको छ ।

बराहपोखरी, जन्तेढुंगा, खोटेहाङ, केपीलासगढी गाउँपालिकामा भर्चुवलले ईन्टरनेट जडान गरिसकेको छ । जडान सकिएका गाउँपालिका भवनमा १ एमविपिएस र वडा कार्यालयहरुमा भने माग अनुसारको ईन्टरनेट जडान गरिएको प्रालिले जनाएको छ । केपीलासगढीमा भने प्राविधिक समस्याका कारण नेट सञ्चालनमा समस्या भएको छ । त्यसलाई ५ दिनभित्रमा सुधार गर्ने प्रालिले बताएको छ । रावाबेंशी, ऐसेलुखर्क गाउँपालिका, हलेसी तुवाचुङ नगरपालिका र दिक्तेल रुपाकोट मझुवागढी नगरपालिका यसअघि नै ईन्टरनेटको पहुंचमा थियो ।
                                               २०७५ साउन ५ गते बिहान ८ : ५५ मा प्रकाशित