चिसाङ शेर्पा असार/२२ खोटाङ,
खोटाङको दिप्रुङ चुईचुम्मा गाउँपालिकाको पाँचवटा कृषक समुहलाई उन्नत जातका बोका वितरण गरिएको छ । वितरण गरिएका स्थानका बाख्राहरुमा नश्ल सुधार गरी व्यवसायिक बाख्रा पालनका लागि बोयर जातका बोका वितरण गरिएको हो ।

गाउँपालिकाको २ लाख ५० हजार बिनियोजित रकमबाट मकवानपुरदेखी खरीद गरी बुधबार गाउँपालिकाको वडा नं. १ याम्खाको हरियाली कृषक समुह, वडा नं. ३ छोरम्बुको जनजागरण कृषक समुह, वडा नं. ४ बतासेको हरियाली कृषक समुह, वडा ५ सप्तेश्वर छितापोखरीको सिद्धेश्वरी कृषक समुह र वडा नंं. ७ टेम्माको सक्रिय सहभागिता कृषक समुहलाई उन्नत जातको बोयर बोका वितरण गरिएको दिप्रुङ चुईचुम्मा गाउँपालिका प्रमुख भुपेन्द्र राईले जानकारी दिनुभयो ।

यसैविच, दिपु्रङ चुईचुम्मा गाउँपालिकाले ९० प्रतिशत साना तथा ठूला योजनाको अनुगमन सकेको छ । गाउँपालिकाभित्र सञ्चालित योजनाहरुको अनुगमन गदै गाउँपालिकाले पेश्की रकम फस्यौट गर्ने गरेको छ ।
                                               २०७५ असार २२ साँझ ७ : ४५ मा प्रकाशित