समायोजन खबर जेठ/९ खोटाङ,

खोटाङमा भूकम्पका कारण प्रयोगमा नआउँदै भत्किएको गुम्बा पुःर्ननिर्माणका लागि चार स्थानीयले निशुल्क जग्गा दिएका छन् । प्रयोगमा नआउँदै २०७२ साल जेठ १२ गतेको भूकम्पले पूर्णरुपमा क्षतीग्रस्त बनेको दिक्तेल रुपाकोट मझुवागढी नगरपालिका–२ दिक्तेल मुढेस्थित थेकछोक मिन्ट्रोल सम्तेन छोलिङ्ग गुम्बा पुःर्ननिर्माणका लागि स्थानीयले २५ लाख बराबरको जग्गा निशुल्क दिएका हुन् ।

भूकम्पका कारण भत्किएको गुम्बाको ठाउँमा अर्को नयाँ गुम्बा निर्माणका लागि स्थानीय दाफुरी शेर्पाले १ रोपनी ५ आना ३ पैसा २ दाम, पेम्बा शेर्पाले १ रोपनी २ आना २ पैसा, ङतरे शेर्पाले १ रोपनी १ आना २ पैसा र फुरी शेर्पाले १ रोपनी १ आना जग्गा निशुल्क दिनुभएको हो । जग्गादाताले जिल्ला मालपोत कार्यालयमार्फत गुम्बाको नाममा जग्गा पास गरिदिएको थेकछोक मिन्ट्रोल सम्तेन छोलिङ्ग गुम्बा समितिका सचिव पेमादोर्ची शेर्पाले बताउनुभयो ।

दिक्तेल मुढे, पैंया, हुर्लुङ्ग, सोती, खार्मी, नुनथलाका सय घर लाभान्वित हुने भनिएको गुम्बा प्रयोगमा नआउँदै भत्किएपछि मुढेमा करिब एक करोडको लागतमा अर्को गुम्बा बनाउन लागिएको हो । पहिलाको भन्दा ठूलो गुम्बा निर्माणका लागि स्थानीयबाट आवश्यक जग्गा जुटाइएको हो ।