चिसाङ शेर्पा जेठ/३ खोटाङ,
दिक्तेलको अल्छेढुंगा–अस्पताल सडकको घुम्तीमा ढलान गरिएको रड कचिया र कूटो बनाउन प्रयोग हुने गरेको छ । दिक्तेल रुपाकोट मझुवागढी नगरपालिका–२ दिक्तेलस्थित अल्छेढुंगाको बरमूनि २० मिटर सडकमा ठेकेदारले कमसल सामग्रीमा आरसिसी ढलान गर्दा बाहिर निस्किएको रडहरु स्थानियले काट्दै लैजादै घरायसी औजार बनाउने गरेको पाईएको छ ।

दिक्तेल रुपाकोट मझुवागढी नगरपालिकाको ३ लाख लगानीमा संगम निर्माण सेवा कम्पनीले ढलान गरी गत माघ ७ गतेबाट सञ्चालनमा आएको ढलान फुट्ने, उक्कने तथा चिराचिरा हुदैं अन्ततः अहिले उक्त ढलान दिनदिनै निशाना नै मेटिदै गएको छ । नगरपालिकाकै इन्जिनियर केशव गिरीले प्राविधिक स्टीमेट अनुसार गुणस्तरीय प्रमाणित गरेको ढलान तीन महिनामै उक्कीएर रडहरु दिनानु दिन गायब हुंदा इन्जिनियर हाँसोका पात्र बनेका छन् ।

रत्नपार्क–चखेवा भञ्ज्याङबाट जिल्ला अस्पताल जानलाई उक्त घुम्तीमा साना तथा ठूला गाडीहरु चलाउन समस्या हुंदा नगरपालिकाले चप्लेटी ढुंगा माथी आरसिसी ढलान गर्न बजेट छुट्याएको थियो । ठेकेदारले ढलान गर्ने बहानामा छलछाम गरेर पैसाको नास गरेको पाईएको हो । स्थानियका अनुसार, ‘बिहान हेर्दा घुम्तीभरी रडहरु देखिने गरेको तर, साँझमा ती सबै रडहरु गायब हुने गरेको छ ।’

आफ्नो वडाको बजेट र योजना नभएकाले नगरलाई रिपोर्टिङ गर्नेमात्र काम गरिरहेको वडा नम्बर २ का वडाध्यक्ष हर्क बहादुर खत्रीले बताए । कामदारजस्तै लाग्ने ४०/४५ उमेरका ब्यक्तिले रड काट्दै थिए । नाम नबताउने शर्तमा एक ब्यक्तिले भने,“गाडीमा भएकाले फोटो खिच्न सकिन तर, रड भने काट्ने नै गरेको छ ।”

निर्माण कम्पनीले कमसल सामग्रीमा काम गरेको स्वीकार्दै बिग्रिएको सडक पुनः निर्माण कम्पनीले पुर्ण रुपमा बनाउने शर्तमा कागज बनाईएको मेयर दिपनारायण रिजालले बताउनुभयो । आचार्य टोलको बसपार्कमा बर्षातमा बस नजाने समयमा संगम निर्माण सेवा कम्पनी पुनः बनाउन सहमत भएको छ । उहाँले भन्नुभयो, “यदि नबनाए सम्बन्धित निर्माण कम्पनीको फर्म कालोसूचिमा राख्नेछौ ।”