समायोजन खबर चैत /२६ खोटाङ,
रोजगारीका सिलसिलामा यूएईमा रहेका खोटाङ्गे युवाले नयाँ वर्षको स्वागतमा बनभोजको आयोजना गरेका छन् । नयाँ वर्ष २०७५ को अवशरमा खोटाङ समाज यूएईले अबुधाबीस्थित कर्निच पार्कमा बनभोजको आयोजना गरेको हो । प्रवासमा रहेका नेपालीबीच शुभकामना आदान–प्रदान गर्दै थकान मेटाउनका लागि बनभोजको आयोजना गरिएको खोटाङ समाज यूएईका नारायण बस्नेतले जानकारी दिए ।

बनभोजमा यूएईमा कार्यरत नेपालीको उल्लेख्य सहभागीता रहेको थियो । बनभोजका लागि कर्निच पार्कबाट टाढा पर्ने दुबई सार्जा ल्कोज रुवाइसबाट ठूलो संख्यामा खोटाङ्गे र गैर–खोटाङ्गेको उपस्थिति रहेको थियो । प्रवासमा काम गरिरहेकोबेला एक ठाउँमा भेला भएका उनीहरुले एक आपसमा शुभकामना आदान–प्रदान गर्दै नयाँ वर्षको खुसीयाली साटेका छन् ।

बनभोजमा निम्त्याइएका दोहोरी गायक राजाराम बस्नेत, कृष्ण बस्नेत, नरनाथ भण्डारी, गायिका कोपिला राई, अमृता बान्तवा लगायतले ‘खोटाङ जिल्ला दिक्तेल बजार’ बोलको गीतमा दोहोरी गाएर युवायुवतीलाई छमछमी नचाइएका थिए । यूएईमा रहेका महिलालाई मनोरञ्जनका लागि बेलुन फुटाउने खेल खेलाइएको खोटाङ समाज यूएईले जनाएको छ ।
हिमाल गुरुङको सभापतित्वमा सम्पन्न कार्यक्रममा कार्यक्रम समाजका संस्थापक कटक राई, हर्कमणि राई, हातेमालो समाज भोजपुरका अध्यक्ष ज्ञानेन्द्र राई, सुनुवार सेवा समाजकी उपाध्यक्ष मनकुमारी सुनुवार लगायतको उपस्थिति रहेको थियो ।