समायोजन खबर चैत /२६ खोटाङ,

आगलागी हुँदा खोटाङको हलेसी तुवाचुङ नगरपालिका–५ दुर्छिम रातमाटेका पदमराज राई, अकिलराज राई, अगमराज राई र गमराज राईको घर तथा गोठ जलेर नष्ट भएको छ । पदमराजको घरबाट सल्किएको आगोले आईतबार चार घर नष्ट भएको हो ।

आगलागीमा पदमराजको २४ लाख ३० हजार, अकिलराजको २५ लाख ७९ हजार, अगमराजको २४ लाख ५१ हजार, गमराजको २२ लाख ९६ हजार बराबरको क्षती भएको प्रहरीले जनाएको छ । यस्तै, गोठ जल्दा गमराजको ३ वटा बंगुर, ११ वटा बाख्रा र ८ वटा पाठा, अकिलराजको १ वटा बाख्रा र ९ वटा पाठा, पदमराजको २ वटा बंगुर र ४ वटा बाख्रा तथा अगमराजको २ वटा बंगुर जलेर मरेको छ ।

आगलागीबाट बिचल्नीमा परेका अग्नी पिडितलाई आईतबार राती पाल, चामल, नुनतेल, तरकारी, चिउरा, चाउचाउ लगायत प्रदान गरिएको हलेसी तुवाचुङ नगरपालिकाका मेयर इवन राईले बताउनुभयो ।