चिसाङ शेर्पा चैत्र/२३ खोटाङ,
खोटाङमा तीन दिने अपाङगता घुम्ति शिबिर सञ्चालन हुने भएको छ । आगामी बैशाख ३ गतेबाट जिल्लाको विभिन्न स्थानमा शारीरिक परीक्षण एवंम् सहायक सामग्री तथा कृत्रिम हातखुट्टा नापजाँच सम्बन्धि शिबिर हुने भएको हो ।

ह्युमानिटी एण्ड ईनक्लुजनको सहयोग, सिबिआर बिराटनगरको आयोजना तथा हलेसी तुवाचुङ, दिक्तेल रुपाकोट मझुवागढी नगरपालिका, खोटेहाङ गाउँपालिका र अपाङ सेवासंघ दिक्तेलको आयोजनामा हुने शिबिरमा शरीर अररो भएका, पैताला फर्केका, हातखुट्टा काटिएका, आगोले पोलेर हातखुट्टामा संकुचन भएका, हातखुट्टा कमजोर, छोटो वा सुकेको, हातखुट्टा बाङगो भएका, पेरालाईसिस भएका, कम्मर मुनि नचल्ने, ढाड कुप्रेको र हातखुट्टा नचल्ने ब्यक्तिहरु शिबिरबाट लाभान्वित हुने आयोजकले जनाएको छ ।

आयोजकका अनुसार हलेसी तुवाचुङ नगरपालिका–७ महादेवस्थान स्वास्थ्य चौकीमा बैशाख ३ गते सोमबार, दिक्तेल रुपाकोट मझुवागढी नगरपालिका–१ दिक्तेल जिल्ला अस्पतालमा बैशाख ५ गते बुधबार र खोटेहाङ गाउँपालिका–७ खोटाङबजार स्वास्थ्य चौकीमा बैशाख ७ गते शुक्रबार घुम्ति शिबिर सञ्चालन हुनेछ ।