चिसाङ शेर्पा पुस/२२ खोटाङ,

हलेसीमा आगलागी पिडितका लागि प्रधानमन्त्री शेर बहादुर देउवा समक्ष सहयोगको अनुरोध गरिएको छ । गत मंगलबार साँझ आगलागीबाट घर तथा अन्नपात ध्वस्त भएका हलेसी तुवाचुङ नगरपालिका महादेबस्थान ७ का मगम राई, उचित बहादुर राई, तम्बराज राई, अम्बराज राई र मगमको घरमा होलसेल पसल गर्ने उदयपुर कटारीका व्यवसायी जगदीस दास लगायतका पिडितको सहयोगका लागि अपिल गरिएको हो ।

अग्नि पिडित परिवारलाई नगरपालिका, विभिन्न संघसंस्था र प्रवासबाट राहत उपलब्ध भईरहेको अवगत गराउँदै राज्यको तर्फबाट थप सहयोगको लागि प्रधानमन्त्री तथा मन्त्रीपरिषदको कार्यालय पुगेर शनिवार प्रधानमन्त्री देउवा समक्ष सहयोगको अनुरोध गरिएको हलेसी तुवाचुङ नगरपालिकाका उपप्रमुख बिमला राईले बताउनुभयो । नगरपालिकाको सहयोग निबेदन लिदै प्रधानमन्त्री देउवाले पिडितका लागि सक्दो सहयोग गर्ने प्रतिबद्धता जनाउनु भएको कांग्रेस क्षेत्र नम्बर दुईका महासमिति सदस्य रबि प्रकाश राईले जानकारी दिनुभयो ।

संक्रमणकालिन अवस्थामा रहनुभएका प्रधानमन्त्री देउवाले सहयोगको आश्वसन दिलाए पनि त्यसलाई जिल्लाका नेताहरुले फ्लोअप गरेमा निश्चयरुपमा पिडितहरुले सहयोग पाउने नगरपालिका उपप्रमुख राईले बताईन् । गत पुस १८ गते मगमको घरबाट शुरु भएको आगोले ५ करोड ११ लाख १५ हजार बराबरको क्षति भएको थियो ।