चिसाङ शेर्पा पौष/२ खोटाङ,

खोटाङमा स्वास्थ्य बिमा कार्यक्रमको पुर्ब तयारी अन्तिम चरणमा पुगेको छ । नेपाल सरकार सामाजिक स्वास्थ्य सुरक्षा बिकास समितिको सहयोगमा जिल्लामा सञ्चालन हुन लागेको स्वास्थ्य बिमाकोे समिति गठन र अभिमुखीकरण कार्यक्रम आईतबार अन्तिम अवस्थामा पुगेको हो ।

२ नगरपालिका ८ गाउँपालिका रहेको खोटाङमा स्थानिय तह प्रमुखको संयोजकत्व र उपप्रमुखलाई आमन्त्रित सदस्य राखेर दुई नगरपालिका ६ गाउँपालिकामा समिति गठन गरिसकेको जनस्वास्थ्य निरिक्षक हिमलाल ज्ञवालीले बताउनुभयो । प्रत्येक नगर तथा पालिकामा ७ सदस्य ‘स्थानिय तह स्वास्थ्य सुरक्षा संयोजन समिति’ गठन भईसकेको छ ।

जनस्वास्थ्य निरिक्षक ज्ञवालीका अनुसार शनिबारसम्म हलेसी तुवाचुङ नगरपालिका, लामिडाडाँ गाउँपालिका, ऐसेलुखर्क गाउँपालिका, केपिलासगढी गाउँपालिका, दिपु्रङ गाउँपालिका, साकेला गाउँपालिका, खोटेहाङ गाउँपालिका र रुपाकोट मझुवागढी नगरपालिकामा समिति गठन गर्दै स्वास्थ्यकर्मीहरुलाई कार्यक्रम सम्बन्धि अभिमुखीकरण दिएकोे छ ।

गएको मंसिर १६ गतेबाट स्वास्थ्य बिमाको काम थालेको टोलीले बाँकी दुई पालिका जन्तेढुंगा गाउँपालिका र बराहापोखरी गाउँपालिकामा पुस ४ र ५ गते सबै प्रक्रिया सक्ने जनाएको छ । त्यहाँ अघिल्लो दिन सरोकारवाला र दोश्रो दिन पालिकाभित्रका स्वास्थ्यकर्मीसँग अभिमुखीकरण हुनेछ ।

जिल्लाका स्थानीयवासीले वार्षिक रुपमा दुई हजार ५ सय तिरेर एकाघरको बढीमा पाँच जनाको स्वास्थ्य बीमा गर्न सक्नेछन् । बिमा गराएका परिवारले बढीमा ५० हजार बराबरको स्वास्थ्य उपचार पाउने जनाइएको छ ।

जनस्वास्थ्य सहायक अधिकृत श्रीकृष्ण प्रजापतीका अनुसार जिल्लामा वडा स्तरिय सरोकारवाला कार्यक्रम अगामी ७ गतेभित्र सकिनेछ । त्यसपछी स्थानिय स्वास्थ्यकर्मीले वडा गाउँ तहमा अभिमुखीकरण दिनेछन् । उनले भने, “हामीले पुस ११ गतेभित्र दर्ता सहयोगी छनौट गरिदिन वडाध्यक्षहरुलाई अनुरोध गरेका छौ । दर्ता सहयोगी छनौट लगत्तै स्वास्थ्यकर्मीलाई तीन दिने तालिम हुनेछ त्यसपछी स्वास्थ्य बिमा सदस्यता लिने काम शुरु हुन्छ ।”