चिसाङ शेर्पा मंसिर/२६ खोटाङ,

खोटाङको बाक्सिलामा ‘प्रथम केपिलासगढी गाउँपालिका प्रमुख कप आमन्त्रित राष्ट्रिय कराते प्रतियोगिता शुरु भएको छ । “स्वस्थ र सभ्य समाज निर्माणका लागि खेलकुदको बिकास गरौ” भन्ने नाराका साथमा मंगलबारवाट केपिलासगढी गाउँपालिका –४ बाक्सिलास्थित पृथ्वी माध्यमिक बिद्धालयको खेलमैदानमा बृहत राष्ट्रिय कराँते प्रतियोगिता शुरु भएको हो ।

केपीलासगढी गाउँपालिका बाक्सिला र नेपाल सितोरियो कराते संघ जिल्ला शाखा दिक्तेलको संयुक्त आयोजनामा शुरु भएकोे दुई दिवसिय आमन्त्रित राष्ट्रिय कराते प्रतियोगिताको उद्घाटनसंगै तीनवटा प्रतियोगिता भएको छ । केपिलासगढी गाउँपालिका प्रमुख कृष्ण कुमार राईले ब्यानर खोलेर कार्यक्रमको उद्घाटन गर्नुभएको थियो ।

निर्धारित समयभन्दा ढिला भएको कार्यक्रममा महिला एकलकाता ईभेण्ट सम्पन्न भएको छ । खोटाङका रोष्मा राई प्रथम, साङगे शेर्पा सिन्धुपाल्चोक द्धितीय, गोमा राई भोजपुर र शर्मिला श्रेष्ठ ओखलढुंगा तृतिय भएकी छन् । पुरुष एकलकातातर्फ ओखलढुंगाका अरुण श्रेष्ठ प्रथम भएका छन् । समय अभावका कारण खोटाङका मेतीचन्द्र राई र उदयपुरका सनम मगर सेमिफाईनलमा प्रवेश गरेका छन् । उनीहरु बुधवार दोश्रो स्थानका लागि प्रर्तिसपर्धा गर्नेछन् । सिन्धुपाल्चोकका बुद्धिमान तामाङ तेश्रो भएका छन् ।

यस्तै महिला/पुरुष कुमितेको दुईवटा क्वाटरफाईनल खेल सकिएको छ । ६१ केजी तौल समुह अन्तरगत खोटाङका जस्मिना राईलाई पराजित गर्दै ओखढुंगाका निरुता तामाङ महिला कुमितेको सेमिफाईनलमा पुगेकी छन् । सिन्धुपाल्चोकका संजिव गोलेलाई पराजित गर्दै बाक्सिला डोजोका रुरीहाङ राई पुरुष कुमितेको सेमिफाईनलमा पुगेका छन् ।

आयोजक टिम बाक्सिलासहित खोटाङ, सोलुखुम्बु, ओखलढुंगा, उदयपुर, सिराह, तेह्रथुम, भोजपुर, नवरपरासी र सिन्धुपाल्चोक गरी ९ जिल्लाका १० जना निर्णायक र १ सय १० खेलाडीले सहभागिता जनाएको नेपाल सितोरियो कराते संघका जिल्ला अध्यक्ष सञ्जयकुमार राईले बताए । १७ स्वर्णपदक, १७ रजतपदक ३४ कास्यपदकका लागि प्रतियोगिता भईरहेको हो ।

प्रतियोगीतामा प्रथम स्थान प्राप्त गर्ने टिमलाई नगद ५० हजार, दोश्रो हुने टिमलाई ३० हजार र तेश्रो हुने टिमलाई २० हजारका साथमा ट्रफी र प्रमाणपत्र प्रदान गरिने आयोजक बाक्सिला डोजो प्रमुख देउधन राईले बताए । कार्यक्रममा नेपाल कराते महासंघका प्रबक्ता राजेश अधिकारी, खोटाङ कराते संस्थापक बरिष्ठ प्रशिक्षक नवराज राई, किरात राई खेलकुदसँग केन्द्रिय सचिव गंगा राईको उपस्थिती रहेको थियो ।