चिसाङ शेर्पा मंसिर/१५ खोटाङ,

लोकसेवा आयोग सगरमाथा अञ्चल कार्यालयको नवनिर्मित भवन विधिवत रुपमा उद्घाटन गरिएको छ । सदरमुकाम दिक्तेलस्थित जिल्ला प्रशासन कार्यालय नजिक रहेको आयोगको नयाँ भवन निर्माण सम्पन्न भएको ४ वर्षपछि लोकसेवा आयोगका अध्यक्ष उमेश प्रसाद मैनालीले शुक्रवार उद्घाटन गर्नु भएको हो ।

सगरमाथा अञ्चलभित्र कर्मचारी पदपुर्ती गर्नका लागि २०२४ सालमा स्थापना भएको लोकसेवा आयोग सगरमाथा अञ्चल कार्यालय आफ्नै भवन नहुंदा ४६ वर्ष भाडामा बस्दै आएको थियो । २ करोड ६३ लाख ६६ हजार ९५२ रुपैयाँमा निर्माण सम्पन्न भवन समय अनुकुलता र प्राविधिक कारणले औपचारिक उद्घाटनमा ढिलाई भएको लोकसेवा आयोग सगरमाथा अञ्चल कार्यालय निर्देशक सुर्य कोईरालाले बताए । उनले भने, ‘भवन अभावमा यस अघि सानातिना परिक्षासमेत विद्धालयहरुमा गराउदै आएको आयोगले अब, आफ्नै भवनमा गराउँने छ ।’

सगरमाथा अञ्चल आयोगले २०४५ साल असार ३० गते दिक्तेलका राम कुमारी सैंजु, तुलसीराम आचार्य र मनराज आचार्यको ६ रोपनी १ दाम जग्गा खरिद गरी २०६७ सालदेखी कागजी प्रक्रियासंगै भवन बनाउन थालेको थियो । २०७० असार ११ गते दिवा निर्माण सेवा प्रालि सातदोबाटो नामक निर्माण कम्पनीबाट आयोगले भवन जिम्मा लिएर कामकाज गर्दै आईरहेको थियो ।

उद्घाटन कार्यक्रमका विशिष्ट अतिथि तथा आयोगका अध्यक्ष मैनालीले निर्मित भौतिक पुर्बाधारले आयोगका कर्मचारीलाई साना परिक्षा, ल्याब परिक्षाजस्ता काम गर्न सहज बनाउने र जिल्लामा निर्मित भवन लोकसेवा आयोगको मुल्यमान्यताको प्रतिकको रुपमा रहने बताउनुभयो । कार्यक्रममा लोकसेवा आयोगका माननिय सदस्य बृन्दा हाडा, सचिव महेन्द्र प्रसाद गुरागाई, सह,सचिव लक्ष्मी विलास कोईराला, उपसचिव केशब शर्मा लगायतले भवन निर्माण भएकोमा सबैलाई बधाई तथा शुभकामना दिनुभएको थियो ।