समायोजन खवर कार्तिक २६ खोटाङ,

खोटाङमा मतदाता शिक्षा कार्यक्रम सुरु भएको छ । मंसिर १० गते हुने प्रदेशसभा र प्रतिनिधिसभाको निर्वाचनप्रति मतदातालाई सचेत र जागरुक बनाउनका लागि शनिबारदेखि जिल्लाका दुई गाउँपालिका र आठ गाउँपालिकाका ७९ वटै वडामा मतदाता शिक्षा कार्यक्रम सुरु गरिएको हो ।

शुक्रबार एक दिने तालिम दिएर १७९ मतदाता शिक्षा कार्यकर्ता र मतदाता शिक्षा स्वयंसेवकलाई मतदाता शिक्षाका लागि गाउँ–गाउँमा खटाइएको जिल्ला निर्वाचन अधिकारी दिनेश खत्रीले बताउनुभयो । शनिबारदेखि खटिएका तालिम प्राप्त मतदाता शिक्षा कार्यकर्ता र मतदाता शिक्षा स्वयंसेवकलाई मंसिर १० गतेसम्मै फिल्डमा खटाइने जिल्ला निर्वाचन कार्यालयले जनाएको छ ।

एलजिसिडीपीका सामाजिक परिचालक, बालबिकास केन्द्रका सहयोगी कार्यकर्ता र महिला स्वास्थ्य स्वयंसेबिका लगायतलाई प्रशिक्षक तालिम दिएर मतदाता शिक्षा कार्यक्रममा खटाइएको हो । निर्वाचन आयोगको नमूना मतपत्र, पर्चा, पम्प्लेट, ब्रोसर लगायतका सामग्री बोकेर मतदाता शिक्षा स्वयंसेवक गाउँ खटिएका छन् । आसन्न निर्वाचनका लागि जिल्लामा १३६ मतदानस्थल र १७९ मतदान केन्द्र तोकिएका छन् ।