चिसाङ शेर्पा कार्तिक÷१० खोटाङ,

प्रदेश तथा प्रतिनिधिसभा निर्वाचनको मिति नजिकिएसँगै जिल्लामा क्रियाशील पत्रकारहरुलाई निर्वाचन आचारसंहिता सम्बन्धी एक दिने तालिम दिइएको छ । आगामी मंसिर १० गते हुने प्रदेश तथा प्रतिनिधिसभा निर्वाचनलाई लक्षित गरेर शुक्रबार खोटाङमा एक दिने तालिम दिइएको हो ।

जिल्ला निर्वाचन कार्यालयले आयोजना गरेको तालिममा निर्वाचन सफल बनाउन पत्रकारले निर्वाह गर्नुपर्ने भूमिका, आचारसंहिता, गोपनीयता लगायतका विषयमा जानकारी गराइएको छ । जिल्लामा क्रियाशील १७ जना पत्रकारहरुको सहभागिता रहेको तालिममा नेपाल पत्रकार महासंघ खोटाङका अध्यक्ष दमन राई, सम्पादक समाजका अध्यक्ष कृष्ण आचार्य र जिल्ला निर्वाचन अधिकारी दिनेश खत्रीले तालिमको सहजीकरण गर्नुभएको थियो ।

तालिम उद्घाटन कार्यक्रमलाई सम्बोधन गर्दै प्रमुख अतिथि एवम् प्रमुख जिल्ला अधिकारी एकदेव अधिकारीले जिल्लामा क्रियाशील पत्रकारहरुको सुरक्षाका लागि आफू प्रतिवद्ध रहेको बताउनुभयो । “पत्रकारहरु सूचनाको सम्वाहक हुन् ।” उहाँले भन्नुभयो, “सूचनाको सम्वाहक पत्रकारहरुको सुरक्षाका लागि प्रशासन सम्वेदनशील रहेको छ ।”

प्रजिअ अधिकारीले निर्वाचनसँगै जिल्लामा हुने हरेक गतिविधिलाई निर्धक्क भएर प्रकाशन तथा प्रशारण गर्न पत्रकारहरुलाई सुझाव पनि दिनुभयो । “सत्य, तथ्य र विश्वसनीय समाचार प्रकाशन तथा प्रशारण गर्नु पत्रकारको धर्म नै हो ।” उहाँले भन्नुभयो, “यथार्थ विषयलाई लिएर पत्रकारले समाचार लेख्दा कुनै पनि घटना हुन दिइने छैन ।”

निर्वाचन कार्यालयले मतदाता शिक्षालाई जनस्तरसम्म पु¥याउन सामाजिक परिचालक, शिक्षक, वडा सचिव लगायतलाई पनि तालिम दिने तयारी गरेको छ । प्रदेशसभामा दुई क्षेत्र र प्रतिनिधिसभामा एक क्षेत्र रहेको जिल्लामा राजनीतिक दलहरु आफ्नो चुनावी अभियानलाई लिएर गाउँगाउँमा पुगेका छन् ।