चिसाङ शेर्पा÷ भदौ २४ खोटाङ,

खोटाङ कांग्रेसले आगामी मंसिर १० गते हुने भनिएको संघ र प्रदेशसभाको निर्वाचनको पुर्वतयारीकारुपमा जिल्लाका नौ पालिकामा शनिबार १०३ औं बिपी जयन्ती मनाएको छ । जिल्लाका दुई नगरपालिका र आठ गाउँपालिकामध्ये बराहपोखरी गाउँपालिका बाहेकका पालिकामा जयन्ती मनाउनका लागि जिल्लाका अधिकांश नेता पुगेको कांग्रेस महासमिति सदस्य बिष्णुकुमार राईले बताउनुभयो ।

जयन्तीकाक्रममा भेला हुने कांग्रेस नेता तथा कार्यकर्ताको बिचमा कार्यकर्ता प्रशिक्षण, स्थानीय तहको निर्वाचनको समिक्षा, संघ र प्रदेशको निर्वाचनको तयारीका लागि रणनिती निर्माण गर्दै परिणाम आफ्नोपक्षमा पार्नका लागि आधार निर्माणका काम गरिने कांग्रेसले जनाएको छ ।

संघ र प्रदेशको निर्वाचनको तयारीका लागि कांग्रेसले तत्काल संगठन सुढृढिकरण अभियान चलाएर ३० हजार कार्यकर्तालाई नयाँ साधारण सदस्यता वितरण गर्ने जनाएको छ । निर्वाचन तयारीकै लागि कांग्रेस क्षेत्र नम्बर २ को आयोजनामा भदौ २७ र २८ गते बराहपोखरी गाउँपालिकामा प्रशिक्षण कार्यक्रम गर्ने कांग्रेसले जनाएको छ ।