चैत्र १६, २०७३– नेपालले एसिया कप छनोटमा मंगलबार खराब सुरुआत गरेको छ । नेपाल छनोट अन्तर्गत समूह ‘एफ’ को पहिलो खेलमा फिलिपिन्सको हातबाट ४–१ ले पराजित रह्यो । मनिलास्थित रिजाल मेमोरियल स्टेडियममा बेहोरेको यो हारसँगै नेपाल फिलिपिन्ससँग लगातार चौथो खेलमा पराजित भएको छ । यससँगै नेपालको छनोट यात्रा पनि कठिन हुने संकेत दिएको छ । 

नेपाल सुरुदेखि १० खेलाडीमा सीमित भएर खेल्न बाध्य भएको थियो । यसले टिममाथि ठूलो दबाब सिर्जना भयो । विक्रम लामाले १२ औं मिनेटमा पेनाल्टी एरियामा बल ह्यान्ड गरेपछि नेपाल १० खेलाडीमा समेटिएको हो । तर त्यस क्रममा फिलिपिन्सले प्राप्त गरेको पेनाल्टीलाई भने नेपाली गोलरक्षक किरण चेम्जोङले जोगाए । 

तर घरेलु टिम फिलिपिन्स २१ औं मिनेटमा प्राप्त पेनाल्टीबाट भने अग्रता लिन सफल भयो । त्यसमा कप्तान जेम्स योङहजब्यान्डले गोल गरे । फिलिपिन्सले लगत्तै दोस्रो गोल गर्‍यो । यो पनि योङहजब्यान्डकै नाममा रह्यो । लियान्ड रामजेले २८ औं मिनेटमा तेस्रो गोल गरेपछि खेल पूर्णत: फिलिपिन्सको पक्षमा गएको थियो । 

इन्ज्युरी समयको दोस्रो मिनेटमा विशाल राईले नेपालका लागि गोल गर्दै टिमलाई खेलमा फर्काउने प्रयास गरे । तर ७२ औं मिनेटमा फिलिपिन्सको तर्फबाट जाभिएर पाटिनोले चौथो गोल गरे । विराज महर्जनले फिलिपिन्सविरुद्ध सुरुदेखि खेल्न पाएनन् । उनको स्थानमा भरत खवासले पहिलोपल्ट नेपाली राष्ट्रिय टिमको कप्तानी सम्हालेका थिए । नेपालीका लागि जापानी प्रशिक्षक ग्योटोकु कोजीले सुरुदेखि सम्हालिएर खेल्न नसक्दा हार बेहोरको बताए । उनले भने, ‘हामी खेलमा सम्हालिनै पाएनौ । सुरुदेखि नै एकपछि अर्को नराम्रो हुँदै गयो । हामीले यस्तो नतिजा अपेक्षा गरेको थिएनौ ।’ तर सुरुआतदेखि अप्ठेरोमा परेको आफ्नो टोलीले जति गर्न सक्यो त्यसमा भने आफू खुसी रहेको उनले सुनाए । 
फिलिपिन्सका प्रशिक्षक थोमस डोलीले आफ्ना खेलाडीले योजनाअनुसार खेलेको बताए ।

पहिलो हाफको अन्तिममा खान नहुने गोल खाएको बताउने उनले टिमका लागि यो ३ अंक निकै महत्त्वपूर्ण रहने सुनाए ।