फाल्गुन २४, २०७३- शन मार्स र म्याट रेनसवको संघर्षमय अर्धशतकमा अस्ट्रेलियाले आइतबार विश्व नम्बर एक भारतविरुद्धको दोस्रो टेस्टमा पहिलो इनिङ्सका आधारमा महत्त्वपूर्ण अग्रता लिएको छ । भ्रमणकारी अस्ट्रेलियाले एम चिन्नास्वामी रंगशालामा दोस्रो दिनको खेल समाप्तिमा २३७–६ को स्कोर बनाई ४८ रनको अग्रता लिएको छ ।
बिनाक्षति ४४ रनबाट दिनको खेल प्रारम्भ गरेको अस्ट्रेलियाबाट म्याथ्यु बेड २५ र मिचेल स्टार्क १४ रन बनाएर क्रिजमा छन् । मार्सले अस्ट्रेलियाबाट सर्वाधिक रन बनाउने क्रममा १ सय ९७ बलमा ६६ रन जोडे । दिनको खेल समाप्त हुने क्रममा भारतीय सिमर उमेश यादवको बलमा मार्सले थकित शट खेलेर शट मिडविकेटमा क्याच दिन पुगे ।
देब्रेहाते स्पिनर रवीन्द्र जडेजाले ३ विकेट लिए । धेरै उछाल लिइरहेको पिचमा उनले अस्ट्रेलियाका कप्तान स्टिभ स्मिथलाई ८ र रेनसवलाई ६० रनमा आउट गरी भारतलाई महत्त्वपूर्ण सफलता दिलाए । भारतले पहिलो इनिङ्समा १ सय ८९ रनमात्र बनाएको थियो ।
तीव्र बलरद्वय इशान्त शर्मा र यादवले १–१ विकेट लिए पनि अस्ट्रेलियाका ब्याट्सम्यानले महत्त्वपूर्ण साझेदारी गरी भारतको स्कोरलाई उछिन्न सहयोग गरेका थिए ।
