समायोजन खबर खोटाङ, खोटाङमा यात्रुबहाक बस दुर्घट्ना हुँदा सात जना सामान्य घाईते भएका छन्। मध्यपहाडी लोकमार्ग अन्तर्गत दिक्तेल रुपाकोट मझुवागढी नगरपालिका–१३ नुनथलास्थित महुरेगढी वहुप्राविधिक शिक्षालय नजिक पूर्वको काँकटभिट्टाबाट दिक्तेलतर्फ जाँदै गरेको प्र १–०१–००१ ख ३५०८ नम्बरको रात्री बस दुर्घट्ना हुँदा उनीहरु सामान्य घाईते भएका हुन्।

बुधबार बिहान अन्दाजी ८ बजेर १० मिनेटमा सडकको दायाँ साइडमा पल्टिदा बसका चालक झापा मेचिनगर नगरपालिका–७ का ३६ वर्षीय स्ट्रङ राई, मोरङको पथरी नगरपालिका–५ का २९ वर्षीय अमृत पाण्डे, सोही ठाउँका ३५ वर्षीया किशोर लिम्बु, खोटाङ हलेसि तुवाचुङ नगरपालिका– १० अर्खौलेका ४० वर्षीय नर बहादुर खत्री, दिक्तेल रुपाकोट मझुवागढी नगरपालिका–८ चिउरीडाँडाका २५ वर्षीय कुबीर दाहाल, सोही स्थानका २५ वर्षीय सरोज विश्वकर्मा र २८ वर्षीय हिरानराज खतिवडा घाईते भएका छन्।

घाईतेको स्वास्थ्य चौकी नुनथलामा सामान्य उपचार पश्चात जिल्ला अस्पताल दिक्तेल ल्याईएको छ । बसमा १९ जना सवार थिए। काँकडभिट्टाबाट विजुलेसम्म बसलाई स्ट्रङ राईले चलाएका थिए। त्यहाँबाट अर्को चालक झापा मेचिनगर नगरपालिका–६ का ४१ वर्षीय पेमा तामाङले बस चलाएका थिए। चालक तामाङले मादक पदार्थ सेवन गरी बस चलाएको प्रारम्भिक अनुसन्धानबाट खुलेको प्रहरीले जनाएको छ। उनलाई प्रहरीले नियन्त्रणमा लिएको छ।