समायोजन खबर खोटाङ, खोटाङको दिक्तेल रुपाकोट मझुवागढी नगरपालिका–६ नेर्पाको वडाध्यक्षमा माधब राई नै दोहोरिएका छन्।

२०७४ सालको स्थानीय तह सदस्य निर्वाचनमा नेकपा माओवादी केन्द्रबाट वडाध्यक्षमा निर्वाचित भएका राई गत बैशाख ३० गते भएको निर्वाचनबाट पुनः वडाध्यक्षमा विजयी भएका हुन्।

स्थानीय तह सदस्य निर्वाचन अन्तर्गत सोमबार मध्यान्ह सम्पन्न वडाको अन्तिम मतगणना अनुसार राईले ६०१ मत ल्याएर विजयी हाँसिल गरेका हुन्। त्यहाँ वडामा माओवादी केन्द्र र नेकपा एकीकृत समाजवादी पार्टीले गठबन्धन गरेको थियो।

राईको प्यानलमा महिला सदस्य लक्ष्मी राईले ६१९, दलित महिला सदस्य गिता नेपाली रोकाले ६३७, खुल्ला पुरुष वडा सदस्य लोकेन्द्र राईले ५४९ र चेतनाथ आचार्यले ५१६ मत प्राप्त गरेर विजयी भएका छन्।

यस्तै, वडाध्यक्षका प्रत्यासी एमालेका चित्र राईले ५४१, कांग्रेसका हरिभक्त राईले ११७ र राप्रपाका इन्द्रप्रसाद रिजालले ५७ मत ल्याएका छन्।