समायोजन खबर खोटाङ, खोटाङमा शनिबारदेखि ५५ वर्ष माथिकालाई पहिलो मात्राको भेरोसेल खोप लगाईने भएको छ। कोरोना भाईरस विरुद्धको खोप दई नगरपालिका र आठ गाउँपालिकाको ७९ वटा स्वास्थ्य संस्थावाट लक्षित वर्गलाई लगाईने भएको हो।

स्वास्थ्य कार्यालय खोटाङका प्रमुख पुन्यप्रसाद सिग्देलका अनुसार दुई दिन (शनिबार र आईतबार) भेरोसेल खोप लगाईनेछ। ५५ वर्ष माथिका नागरिक, ५५ वर्ष माथिका खोप लगाउन छुटेका सवै नागरिक, शिक्षक र कर्मचारी सबैलाई खोप दिईनेछ।

भेरोसेल खोप लगाई सकेपछि तुरुन्तै जोन्सन एण्ड जोन्सन खोप लगाईने स्वास्थ्य कार्यालयले जनाएको छ। जोन्सन एण्ड जोन्सन खोप भने एक डोज मात्रै लगाए पुग्छ। यसअघिका कोभिशिल्ड र भेरोसेल खोप दुई डोज लगाउनु पर्ने मापदण्ड छ।

जिल्लाभर हालसम्म १८ हजार हाराहारीमा कोभिशिल्ड र भेरोसेल खोप लगाईएको छ। कोभिशिल्डको दोश्रो डोज लगाउनेको मात्रा धेरै र भेरोसेल खोपको दोश्रो डोज लगाउनेको मात्रा कम रहेको स्वास्थ्य कार्यालय खोटाङका प्रमुख सिग्देलले बताए।