समायोजन खबर खोटाङ, जेठ अन्तिम साता हुनुपर्ने कक्षा १२ को परीक्षा साउन ३१ गतेदेखि हुने भएको छ। राष्ट्रिय परीक्षा बोर्डको मंगलबार बसेको बैठकले साउन ३१ गतेदेखि विद्यार्थीको भौतिक उपस्थितिमै परीक्षा लिने निर्णय गरेको छ।

बोर्डका अध्यक्ष चन्द्रमणि पौडेलको अध्यक्षतामा बसेको बैठकले साउन ३१ गतेबाट परीक्षा सञ्चालन गर्ने निर्णय गरेको हो। पौडेलका अनुसार परीक्षा विद्यार्थीहरू पढेकै विद्यालयमा साउन ३१ गतेदेखि हुने र सय पूर्णाङ्कै परीक्षा हुने भएको छ। परीक्षा भदौ ९ गते सकिनेछ।

गएको जेठ अन्तिम तिर हुनुपर्ने कक्षा १२ को परीक्षा कोरोना भाइरस महामारीका कारण रोकिएको थियो। कक्षा १२ मा परीक्षाका लागि झण्डै चार लाख विद्यार्थीले परीक्षाको फारम भरेका थिए।