समायोजन खबर खोटाङ,खोटाङमा थप २६ जनामा कोरोना संक्रमण पूष्टि भएको छ। शुक्रबार विभिन्न नगरपालिका तथा गाउँपालिकामा परिक्षण गर्दा उनीहरुमा संक्रमण पूष्टि भएको हो।

दिक्तेल रुपाकोट मझुवागढी नगरपालिमा सात जना, जिल्ला अस्पतालमा दिक्तेलकै दुई जना, जन्तेढुंगा गाउँपालिकामा एक जना, ऐेसेलुखर्क गाउँपालिकामा चार जना, साकेला गाउँपालिकामा ११ जना र हलेसी तुवाचुङ नगरपालिकामा एक जनामा कोरोना संक्रमण देखिएको स्वास्थ्य कार्यालय खोटाङका जनस्वास्थ्य अधिकृत एवं कोभिड फोकल पर्सन आनन्द लामीछाने जानकारी दिए।

योसँगै जिल्लामा कोरोना संक्रमितको संख्या ११८ जना पुगेको छ। हालसम्म एक जना कोरोना जितेर घर फर्केका छन्। संक्रमितमध्ये अधिकांश होम आइसोलेसनमा र केही भने स्वास्थ्य संस्थामा सामान्य उपचारमा रहेको स्वास्थ्य कार्यालयले जनाएको छ।

हालसम्म दिक्तेल रुपाकोट मझुवागढी नगरपालिकामा ५३ जना, हलेसी तुवाचुङ नगरपालिकामा १७ जना, साकेला गाउँपालिकामा २३ जना, ऐसेलुखर्क गाउँपालिकामा १२ जना, रावाबेसी गाउँपालिकामा ५ जना, खोटेहाङ गाउँपालिकामा ५ जना र जन्तेढुंगा गाउँपालिकामा ३ जना संक्रमित छन्। जिल्लामा कोरोनाबाट कसैको ज्यान गएको छैन।