समायोजन खबर खोटाङ, खोटाङ फुटवल एकेडेमीले आयोजना गर्ने दोश्रो जिल्ला अन्तर क्लव पुरुष फुटवल प्रतियोगिता आजवाट सुरु हुंदैछ । ‘स्थानीय खेलाडीको विकास र पहिचान खोटाङ फुटवल एकेडेमीको अभियान’ भन्ने नाराका साथमा दिक्तेलको माटिकोरे खेलमैदानमा प्रतियोगिता सुरु हुंदैछ ।

प्रतियोगितामा १३ टिमले सहभागिता जनाएको छ । प्रतियोगिताको पहिलो खेल आयोजक खोटाङ फुटवल एकेडेमी र योङ व्वाइज युनाइटेड फुटवल क्लवविच प्रतिस्पर्धा हुनेछ ।

प्रतियोगिताको उद्घाटन अखिल नेपाल फुटवल संघ (एन्फा) अध्यक्ष कर्माछिरीङ शेर्पाको प्रमुख आतिथ्य र एन्फा उपाध्यक्ष उपेन्द्रमान सिंसहित केन्द्रीय पदाधिकारीहरुको उपस्थितीमा हुनेछ । अध्यक्ष शेर्पासहितका टोली खोटाङ भित्रिसकेका छन् । उद्घाटन अवसरमा एकेडेमीको आफ्नै गीत सार्वजनिक गरिने र फुटसल सेन्टरलाई निःशुल्क जग्गादानको कार्यक्रम पनि तय भएको छ ।

यस्तै, उद्घाटन सत्रका दिन जिल्लामा क्रियाशिल पत्रकार र केएफए भेट्रान (वुढ्यौली) टिमविच मैत्रीपूर्ण प्रतियोगिता हुने आयोजकले जनाएको छ । प्रतियोगिताको दोश्रो खेल नेर्पा स्पोर्टस क्लव र रुपाकोट फुटवल क्लव, तेश्रो खेल गुप्तेश्वर फुटवल क्लव र बाम्राङ फुटवल क्लव, चौथो खेल युवा जागरण स्पोर्टस क्लव र सोल्मा स्पोर्टस क्लव तथा पाँचौ खेल वाहुनीडाँडा फुटवल क्लव र बुईपा ११ स्पोर्टस क्लवविच हुने आयोजकले जनाएको छ ।

प्रतियोगितामा प्रथम हुने टिमले ८८ हजार ८८८, दोश्रो टिमले ४४ हजार ४४४ र सेमिफाइनलिस्ट दुई टिमले प्रति टिम २२ हजार २२२ नगदका साथमा ट्रफि, मेडल र प्रमाणपत्र पाउनेछन् । विधागततर्फ उत्कृष्ट गोलरक्षक, डिफेण्डर, मिड फिल्डर, गोलकर्ता, कोचलाई जनही पाँच हजार नगद ट्रफि, मेडल र प्रमाणपत्र प्रदान गरिनेछ । सर्वोत्कृष्ट खेलाडीलाई सात हजार नगदका साथमा ट्रफि, मेडल, प्रमाणपत्र र म्यान अफ द म्याचलाई नगद एक हजारका साथमा मेडल प्रदान गरिने खोटाङ फुटवल एकेडेमीका अध्यक्ष नुरकाजी सैजुले बताए ।

खेलकुदको अभियान खोटाङको पहिचान भन्ने नाराका साथमा २०७३ सालमा स्थापना भएको एकेडेमीले गतवर्षदेखी जिल्ला अन्तर क्लव पुरुष फुटवल प्रतियोगिता गराउदै आएको छ । पहिलो संस्करणमा आयोजक नै प्रथम भएको थियो ।