समायोजन खबर खोटाङ, खोटाङको साकेला गाउँपालिकाले सञ्चालन गरेको एकिकृत घुम्ती शिविरवाट ११ सयवढी नागरिकले सेवा लिएका छन् । ज्येष्ठ नागरिक अपाङ्गता भएकालाई परीचयपत्र तथा स्वास्थ्य सेवा सहितको एकिकृत घुम्ती शिविरवाट १ हजार १२० जनाले विभिन्न किसिमका सेवाहरु लिएका हुन् ।

१७ फागुनदेखी वडां.न ५ मात्तिमबाट सुरु गरिएको शिविरमा स्वास्थ्यतर्फ बाँझेच्यानडाँडाका १४५ जना, रतन्छाका ७३ जना, खिदिमाका ७० जना, वडा नं. ४ मात्तिमका १२२ जना र वडा नं. ५ मात्तिमका १०२ जनागरी ५ सय १२ जनाले स्वास्थ्य सेवा लिएको साकेला गाउँपालिकाका प्रमुख प्रशासकीय अधिकृत रविन मगरले जानकारी दिनुभयो ।
प्रमुख प्रशासकीय अधिकृत मगरका अनुसार ११२ जना ज्येष्ठ नागरिकलाई परीचयपत्र वितरण गरिएको छ । जसमा ७० जना महिला र ४२ जना पुरुषले ज्येष्ठ नागरिक परिचयपत्र पाएका छन् । ४ जना महिला र २० जना पुरुषलाई अपांगता परीचयपत्र पनि वितरण गरिएको छ ।

शिविरको अवसरमा ७५ वर्षमाथिका र लठ्ठीको साहार विना हिड्न नसक्ने ४७२ जनालाई लठ्ठी पनि वितरण गरिएको छ । गाउँपालिकाले आफ्नै घर आँगनमा सञ्चालन गरेकोे विषयगत शिविरबाट विभिन्न प्रकारका सेवा लिन पाउँदा सेवाग्राहीहरु हर्षित भएका छन् । शिविर शनिवार समापन भएको छ ।