समायोजन खबर खोटाङ, खोटाङको हलेसी महादेव मन्दिरमा दश दिनमा तीन लाख ६७ हजार वढी भेटीघाटी संकलन भएको छ । हलेसी महादेव शिव पार्वती थान, दान पेटिका, बसाह गुफा, गणेश मन्दिरमा गरी तीन लाख ६७ हजार २३५ रुपैयाँ भेटीघाटी संकलन भएको हो ।

२२ माघदेखी १ फागुनसम्म उक्त भेटीघाटी संकलन भएको हलेसी सूचना केन्द्र प्रमुख सयन्द्र राईले जानकारी दिए । राईका अनुसार शिव पार्वती थानमा दुई लाख ३९ हजार ५७५ रुपैयाँ, मन्दिरको प्राङगणमा रहेको दानपेटिकामा ४२ हजार ४६०, बसाह गुफाको दानपेटिकामा ४७ हजार ८ सय, गणेश मन्दिरमा २८ हजार २२० रुपैयाँ र भारतीय ढ्याके नेपाली साटेको ९ हजार १८० रुपैयाँ भेटीघाटी संकलन भएको छ ।

अमेरिकन डलर १, भारतीय रुपैयाँ ९२० र ५.५ ग्राम चाँदि श्रद्धालु भक्तजनले चढाएका छन् । मुलुकमा संघीय संरचना लागू भएपछि स्थानीय सरकार कार्यन्वयन भएसँगै हलेसी तुवाचुङ नगरपालिकाले हलेसी सूचना केन्द्र स्थापना गरी कर्मचारी राखेर संकलन भएको भेटीघाटी समय–समयमा सार्वजनिक गर्दै आएको छ । भेटीघाटीमा दुरुपयोग हुन नदिन मन्दिर परिसरमा सीसी क्यामेरा राखिएको छ ।

संकलन भएको भेटी गन्न सीसी क्यामेराको निगरानीमा सूचना केन्द्र, हलेसी विकास समिति, प्रहरी र मन्दिर व्यवस्थापन समितिका एक÷एक जना प्रतिनिधि राखिने गरेको हलेसी तुवाचुङ नगरपालिकाका नगरप्रमुख इवन राईले बताए ।

भेटी गनेर सकिएपछि तत्काल बैंकमा जम्मा गरिने र मन्दिर व्यवस्थापन लगायतमा काम गर्ने कर्मचारीहरुलाई बैकिङ प्रणालीबाट तलब दिने व्यवस्था मिलाईएको नगरप्रमुख राईको भनाई छ ।