समायोजन खबर खोटाङ, खोटाङको हलेसी महादेव मन्दिरमा १३ दिनमा २ लाख २२ हजार वढी भेटीघाटी संकलन भएको छ । हलेसी महादेव शिव पार्वती थानमा करीव दुई हप्तामा २ लाख २२ हजार ३५५ रुपैयाँ भेटीघाटी संकलन भएको हो ।

८ माघदेखी २१ माघसम्म उक्त भेटीघाटी संकलन भएको हलेसी सूचना केन्द्र प्रमुख सयन्द्र राईले जानकारी दिए । राईका अनुसार १६ मंसिरदेखी २१ माघसम्म रुद्री, लाख बत्ति लगायत अन्य सहयोग स्वरुप ६५ हजार ३ सय रुपैयाँ भेटीघाटी संकलन भएको छ ।

भारतीय रुपैयाँ १ सय र १.२० ग्राम चाँदि श्रद्धालु भक्तजनले जढाएका छन् । मुलुकमा संघीय संरचना लागू भएपछि स्थानीय सरकार कार्यन्वयन भएसँगै हलेसी तुवाचुङ नगरपालिकाले हलेसी सूचना केन्द्र स्थापना गरी कर्मचारी राखेर संकलन भएको भेटीघाटी समय–समयमा सार्वजनिक गर्दै आएको छ । भेटीघाटीमा दुरुपयोग हुन नदिन मन्दिर परिसरमा सीसी क्यामेरा राखिएको छ ।

संकलन भएको भेटी गन्न सीसी क्यामेराको निगरानीमा सूचना केन्द्र, हलेसी विकास समिति, प्रहरी र मन्दिर व्यवस्थापन समितिका एक÷एक जना प्रतिनिधि राखिने गरेको हलेसी तुवाचुङ नगरपालिकाका नगरप्रमुख इवन राईले बताए ।

भेटी गनेर सकिएपछि तत्काल बैंकमा जम्मा गरिने र मन्दिर व्यवस्थापन लगायतमा काम गर्ने कर्मचारीहरुलाई बैकिङ प्रणालीबाट तलब दिने व्यवस्था मिलाईएको नगरप्रमुख राईको भनाई छ ।