समायोजन खबर खोटाङ, नेपाल विधार्थी संघ(नेविसंघ)खोटाङले सिठ्ठी जुलुस निकालेर वर्तमान ओली सरकारको विरोध गरेको छ ।

आइतबार नेपाली कांग्रेसको पार्टी कार्यालय दिक्तेलबाट रत्नपार्क, रत्नपार्क–हाटडाँडा र हाटडाँडादेखी स्थानीय हेलिप्याडसम्म विधार्थी नेताहरुले एकोहोरो सिठ्ठी बजाउदै सरकारको विरोध गरेको हो ।शासन गर्ने नैतिक आधार गुमाई सकेको सर्वसत्तावादी र भ्रष्ट ओली सरकार विरुद्ध एकोहोरो सिठ्ठी बजाउदै विरोध प्रदर्शन गरिएको नेविसंघ खोटाङका सभापति राजकुमार वस्नेतले जानकारी दिनुभयो ।

वर्तमान सरकारको विरुद्धमा देशव्यापी विरोध प्रदर्शन गर्ने अघिल्लो दिन कांग्रेसको भातृ संस्था नेविसंघले सरकारको विरोध गरेको हो । कांग्रेसले यसअघि नै सूचना जारी गर्दै सोमबार(भोली) सरकार विरुद्ध देशभरका कांग्रेसलाई सडकमा आउन आव्हान गरिसकेको छ ।

खोटाङमा भने कांग्रेसका केन्द्रीय सदस्य गुरुराज घिमिरेको प्रमुख आतिथ्यमा ओली सरकारको कडा विरोध गरिने कांग्रेसका पार्टी सभापति नरेश कुमार श्रेष्ठले जानकारी दिनुभयो ।२०७७ मंसिर २८ गते साँझ ५ :२८ मा प्रकाशित