समायोजन खबर खोटाङ, खोटाङको रावाबेशी गाउँपालिकाले कृषक समुहहरुलाई कृषि र पशु विमा सम्बन्धी क्षमता विकास तालिम दिन थालेको छ । गाउँपालिकाले पालिकामा दर्ता भएका १२० वटा कृषक समुहका व्यवसायिक कृषिमा लागेका कृषकहरुलाई दुई दिने तालिम दिन थालेको हो ।

कृषि व्यवसाय गर्दा आइपर्ने जोखिमबाट बचाउनका लागि विमाले खेल्ने भुमिकाको वारेमा प्रयोगात्मक तथा शैद्धान्तिक रुपले मंगलबारदेखी क्षमता विकास सम्बन्धी तालिम दिन सुरु गरिएको गाउँपालिकाले जनाएको छ ।

मंगलबार दुवेकोलका कृषक समुहका व्यवसायिक कृषिमा लागेका कृषकलाई दिइएको तालिम बुधबार सकिएको छ । त्यहाँ तालिमको उद्घाटन गाउँपालिका अध्यक्ष लिलानाथ निरौलाले गरेका थिए ।

तालिमको सहजीकरण गाउँपालिकाका कृषि शाखा संयोजक मुगाधन राई र लुम्बिनी जनरल इन्स्योरेन्सका अभिकर्ता उद्धव वास्तोलाले गरिरहेका छन् । विहीबार कुभिण्डे र डुम्रेधारापानी तथा अन्य बाँकी तीन वडाहरुमा क्रमशः तालिम सञ्चालन गरिने कृषि शाखा संयोजक राईले बताए । तालिम पुसको ६ गते सम्पन्न हुनेछ ।

क्षमता विकास तालिमले किसानलाई कृषि तथा पुश विमा गर्न प्रेरित गर्ने गाउँपालिका अध्यक्ष निरौलाले बताए । विमा गर्ने कृषकहरुको कागजात रुजु गरेर गाउँपालिकाले २५ प्रतिशत अनुदान दिने अध्यक्ष निरौलाको भनाई छ ।२०७७ मंसिर २४ गते साँझ ७ :५२ मा प्रकाशित