समायोजन खबर खोटाङ, जिल्ला अस्पताल खोटाङबाट रेफर गरिएको विरामीमा कोरोना भाइरसको संक्रमण देखिएको छ । भदौ ४ गते काठमाण्डौ रेफर गरेको विरामीमा कोरोना भाइरसको संक्रमण देखिएको जिल्ला अस्पताल श्रोतले जनाएको छ ।
रेफर गरिएको विरामीको पाटन अस्पतालमा स्वाव संकलन गरी परिक्षण गर्दा कोरोना संक्रमण देखिएको जिल्ला अस्पताल खोटाङका डाक्टर शैलेस श्रेष्ठले बताए । संक्रमित महिला रहेकी छन् ।

उनको बारेमा अन्य डिटेल्स खोज्ने काम भइरहेको डाक्टर श्रेष्ठले बताए । संक्रमितको क्लोज कन्ट्याकमा रहेकाहरुको कन्ट्रयाक ट्रेसिङ गरिने प्रमुख जिल्ला अधिकारी शालिग्राम शर्मा पौडेलले बताएका छन् ।

यसैविच, स्वास्थ्य तथा जनसंख्या मन्त्रालयले जिल्ला अस्पतालबाट रेफर गरिएका उनीसहित खोटाङका चार जनामा कोराना संक्रमण भएको पुष्टि गरेको छ । मन्त्रालयको नियमित प्रेस ब्रिफिङ अन्तर्गत सोमबार प्रवक्ता डा.जागेश्वर गौतमले खोटाङका चार जनामा कोरोना संक्रमण भएको पुष्टि गरेका हुन् ।

रेफर गरिएका बाहेक अन्य तीनजना खोटाङ ठेगाना राखेर काठमाण्डौमा स्वाव दिएर परिक्षण गरिएको हुनसक्ने प्रजिअ पौडेलले बताए । पछिल्लो समयमा जिल्लाबाट पठाएको ८५ जनाको स्वाव मध्येमा ८३ जनाको पिसीआर परिक्षण रिपोर्ट नेगेटिभ आएको छ । दुई जनाको रिपोर्ट आउँन बाँकी छ ।२०७७ भदौ ८ गते राती ८ :४५ मा प्रकाशित