समायोजन खबर खोटाङ, खोटाङको स्थानीय तहहरुले जिल्लामा सञ्चालित सञ्चारमाध्यमलाई लोक कल्याणकारी विज्ञापन उपलब्ध गराउन थालेका छन् । कोरोना भाइरस न्यूनिकरण तथा रोकथामका लागि अहोरात्र खट्ने सञ्चारकर्मीलाई लक्षित गर्दै उनीहरु आबद्ध सञ्चारमाध्यमका लागि लोक कल्याणकारी विज्ञापन उपलब्ध गराउन थालेका हुन् ।

कोरोना भाइरसकोे विषम घडिमा सञ्चारकर्मी, पत्रकारले चलाएको कलमको माध्यमबाट कोरोनासँगको लडाइ जित्न थप हौसला मिलेको र यो बेला सञ्चार माध्यम चलाउन समेत समस्या हुने भएकाले दामासाही रुपमा लोक कल्याणकारी विज्ञापन उपलब्ध गराउने निर्णय गरिएको सूचना जारी गर्दै हलेसी तुवाचुङ नगरपालिकाले जनाएको छ ।

कोरोनाको महामारी लडाईलाई जित्न सारा नेपाली लागि परिरहेको अवस्थामा स्वास्थ्यकर्मी, सुरक्षाकर्मीको कामको योगदान गर्दै कोरोना भाइरससँगको लडाइमा सञ्चारकर्मी र पत्रकारले खेलेको भूमिकाको उच्च मूल्यांकनसहित लोक कल्याणकारी विज्ञापन उपलब्ध गराइएको हलेसी तुवाचुङ नगरपालिकाका नगरप्रमुख इवन राईले बताए ।

नगरपालिकाले कानुन प्राप्त भई जिल्लाबाट सञ्चालित सञ्चारमाध्यमको समस्यालाई बुझेर १० हजारका दरले लोककल्याणकारी विज्ञापन दिएका हुन् । सञ्चारमाध्यमले नगरपालिकाको उपलब्ध गराएको कोरोना भाइरस रोकथाम लागि सन्देशमूलक विज्ञापन प्रशारण तथा प्रकाशन गर्नुपर्नेछ । दुई नगरपालिका, आठ गाउँपालिका रहेको जिल्लामा सबैभन्दा पहिले दिप्रुङ चुइचुम्मा गाउँपालिकाले जिल्लाबाट सञ्चालित सञ्चारमाध्यमलाई १० हजार बराबरको लोक कल्याणकारी विज्ञापन उपलब्ध गराएको थियो ।
सञ्चारमाध्यमलाई लोक कल्याणकारी विज्ञापन उपलब्ध गराउनेमा हलेसी तुवाचुङ नगरपालिका दोश्रो भएको छ । जिल्लामा विधुतीय र छापा माध्यम गरी एक दजर्नबढी सञ्चारमाध्यम सञ्चालनमा छ ।२०७७ बैशाख २४ गते राती ८ :४४ मा प्रकाशित