लोप्ज्योङला तिङला ख्योलने श्यार्वा तिवा मि लुङवाला काङग्यूकी क्ष्योगला ज्यूवु वाउ मिरिग तिवा दा दाक्पी लाका नाछोगकी कोर्ला मि लुङ्वा ल्हाक्पा सिसिन ल्हाक्पा डोई वाई । छिग्याल लुङवाला राङ दा दाक्पी लाका, लोप्ज्युङकी थोकदा छिग्याल्ला राङ ज्युयी वासिनाङ दाक्पी लुग्सो, रिग्स्युङ, डोलुग ताङ किताङ नातङ तिवा सुङक्योप किरुला ताङ छिग्यालला ज्युन साङ पयुलकी श्यार्वी चिछोग नाङला स्याप्जी बुलुला छिग्यालला साङ छोक्पा ताङ किदुग नाछोग तिवा गो चुने गोमा किरु ल्यारिम गोमाला सिसिन ल्हाक्पा सिसिन ल्हाक्पा वाई । ति छोक्पा नाछोगकी नाङ्ला शेर्पा संघ यूरोप साङ च्यिग यिन् । छिलो २०१० ला गो चुने गोमा क्याउ दि छोक्पी क्याउ ल्यारिम ताङ लागा दुकराङ क्यानी युरोपकी श्यार्वा तिवी नेताङ ताङ तान्दी तुछोकी कपला लाक्पा तेन्जी श्यार्वा ताङ छोक्पी चिख्याप फुला श्यार्वी क्याउ अराउरा ।

गोम्क्ष्योगला टाशीदेले आच्यूला । थाङवुराङ ज्यून वाई ल ?

 टाशीदेलेग लस् थाङबुराङ वाई । श्यार्वा संघकी चिख्याप साङ यिन्दु तप्की दि छोक्पी कोर्ला टिक्प्येजी सुङनाङसिन ला ।

श्यार्वा तिवा तन्दी तुछोला दा दाक्पी लाका ताङ लोप्ज्युङकी थोकला राङ्गी लुङवा क्युन ज्याङन्ये मिई लुङवाला ल्हाक्पा सिसिन ल्हाक्पा फेम वाई । दि नाङला युरोपला साङ पयुलकी जोङखा नाछोगन्ये श्यार्वा तिवा ल्हाक्पा सिसिन ल्हाक्पा युरोपला ज्युकी नोक । दुक्याने श्यार्वा तिवा छिग्यालला हुङगुकी जोशा लेन्सी श्यार्वी पेजा तिवी राङगी क्ष्यो, रिग्स्युङ, लुग्सो, किताङ नाताङ तिवा ङ्याम डोप तप्की युरोपला वतु श्यार्वा मिमाङ्ग तिवी मुला ङ्याम्डेल क्यानी राङगी क्ष्यो, रिग्स्युङ, लुग्सो, किताङ नाताङ तिवाला सुङक्योप ताङ चिछोगकी स्याप्सी किरुकी मिग्युल ज्याङन्ये छिलो २०१० जुन २४ ला बेल्जियमकी चिख्याप आङ दोर्जी श्यार्वा ताङ युके श्यार्वा किदुगकी गोमी चिख्याप आङ काल्जाङ श्यार्वी गोठीतला युरोप शेर्पा संघ गो चुवु यिन् । दुकराङ क्यानी पयुलन्ये गोमी कृषि सहायक लोन्पो आङ छिरिङ श्यार्वा, याम्बु श्यार्वी चिछोगकी गोमी चिख्याप पेमा छिरिङ श्यार्वा, ताङ गलैचा उद्योगकी आङ छिरिङ श्यार्वी मिक्सलकी कुडोनला छोक्पा गो चुवु ताङ छोक्पा गो चुतु पर्ला युरोपला ज्युन वातु श्यार्वी किदुग छोक्पा नाछोगकी कुछाप तिवी टोङगुकी नाङ्ला देनी युरोप शेर्पा संघ गो चुवु यिन् ।

शेर्पा संघ युरोप गो जुतुकी मिग्युल खाक्छे ती काङ काङ यिन् ?

दि युरोपला दि छोक्पा गो जुतुकी मिग्युल खाक्छे ती युरोपाला ज्यु नाङगु श्यार्वा मिमाङ्ग तिवाला च्यिगढिल ग्याछे जोप ताङ युरोपला ज्युउ श्यार्वा तिवाला कले खेलु पर्ला याम्बा छोक्पा नाछोग तिवी मुला ङ्याम्डेल क्यानी रोगराम किरु ताङ लो तर्मा गोमान्ये ज्युनकी राङगी लुग्सो ताङ रिग्स्युङ तिवाला सुङक्योप किरु यिन् ।

 दि छोक्पी नाङला पयुलकी चुको चुको जोङ्खाकी श्यार्वा तिवा ज्युन वाई ?

दि छोक्पी नाङ पयुलकी चुको चुको जोङखाला श्यार्वा तिवा ज्युयी वान् वाई दि जोङखाकी श्यार्वा मिमाङ्ग तिवा ज्युन वाई । जोङखाकी मिङ लाङगु यिन् सिसिन् स्यारखुम्बु, रामेछाप, उदयपुर, सिन्धुपाल्चोक जोङखाकी श्यार्वा तिवा च्याई मङा ज्युन वाई । जोङखाकी कुतुक कुतुक श्यार्वा तिवा ज्युन वाई सुङसुङ ।

छोक्पा यर्गे जेापला दाशा दाशाकी साम्क्षारला खेपार वच्यू तेरीकी पर्ला च्यिगढिल चुकई वाई ?

युरोपकी श्यार्वा तिवी एकता याङना च्यिगढिल जम्बुलिङ्गला राङ पे नाङसीन वाए । साम्क्षार ताङ छ्याप्सीकी थोकला दा दाक्पी साम्क्षार याङ चुक क्यान यिनसिनाङ गिवी । ति क्यासिनाङ छोक्पी मिग्युल थोपुला छोक्पी नाङला ज्युवु श्यार्वा तिवी एकता ल्यामु वाई । छोक्पी लागी यिगथोगकी नाङला वतु ल्यारिम तिवा गोढिग किरु पर्ला ल्यामु क्यानी कोङफेल गल् वाई । जोङखा नाछोगकी श्यार्वा मिमाङ्ग ज्युन वासिनाङ श्यार्वी क्ष्यो, के, रिग्स्युङ, ढोलुग तिवा च्यिगराङ वतु तप्की अला कले मे ।

 छिग्याल लुङवाला छोक्पा गो जुतुकी खाक्छेती चो वाई ?

श्यार्वा तिवा छिग्याल लुङ्वा ढोप माङ ल्हाक्पा सिसिन ल्हाक्पा वाई । छिग्यालला वानी मर्चा स्याम्बु तिराङ खाक्छे मिन्, दाक्पी राङगी योन्देन, क्ष्यो, रिग्स्युङ तिवा जीवन्त ज्योकु ताङ राङगी पेजा तिवाला ज्युकथमाला लाम ल्यामु क्ष्या देन्दुला राङगी लुङ्वा छिग्याल् लुङवा क्यानी देसिनाङ छोक्पा ताङ किदुग तिवा गो चुनी गोमा कि गोउ खाक्छे वाई ।

 श्यार्वा तिवा छोक्पा तिराङ गो चुन श्यार्वी वाङक्षा ताङ थोप्ताङ तिवी कोर्ला श्यार्वी चिछोग नाङला सिसिन तेङला थेन्नी लाका कि मथुप वाई सिरु ताम राङगी चिछोग नाङ्न्ये राङ ज्योकिन वाउ हाक कोकी दिकी कोर्ला काङ सुङ्गी ?

 श्यार्वा तिवा राङ्गी चिछोगकी छोक्पी नाङला देनी वाङ्क्षा ताङ थोप्ताङकी कोर्ला श्यूक ग्याक गोकी । छोक्पाला ज्युन् सिसिमा छ्याप्सीकी टेमा हुङ्गु म्यागी । चुको छ्याप्सीला वासिनाङ दाक्पी मुद्दा ज्योकु पर्ला श्यार्वा तिवा च्यिगढिल कि गोउ खाक्छे वाई । जाम्बुलिङ्गला राङ श्यार्वी पयुल लुङ्वी ङोशी तोङ थुपसिनाङ पयुल स्युङकी ल्हाते माक्या वाई । ति तप्की श्यार्वी वाङक्षा थोप्ताङ तिवी कोर्ला क्याउ ङोकोल ताङ कले तिवाला ज्येनी पयुल लोकतान्त्रिक लुङ्वा यिन्दु तप्की राङ्गी वाङक्षा तिवा सुङ्क्योप कि गोकी ताङ दिकी थोकला शेर्पा संघ युरोप वाङक्षा थोप्ताङकी कोर्ला नरी गोमा कियी ।

 श्यार्वा तिवा खाक्छे क्यानी युल्कोरकी थोकला लाका किरु मिमाङ्ग छिग्याल लुङवा ढोप् ल्हाक्पा सिसिन ल्हाक्पा गल् वाई । छिग्याल ढोप ल्यामु मेलोक्पा काङ यिन् पयुलला वतु श्यार्वा स्योनो तिवाला काङ सुङ्गी ?

 श्यार्वा तिवा खाक्छे क्यानी लोप्ज्युङगी थोकला थोन्केन ल्यामु म्येतु तप्की छिग्याल लुङ्वा ल्हाक्पा सिसिन ल्हाक्पा गलु यिन्दे नोकिनोक । श्यार्वा तिवा लोप्ज्युङकी थोकला ल्यामु म्येसिमा स्युङकी दाशा खाक्छेम्बुला ङ्युङमु वाई याङना याम्बा चिछोगकी मिमाङ्ग सिसिन तिङ्ला राङ खेल वाई । ति तप्की श्यार्वा तिवा छिग्याल लुङवा ल्हाक्पा गलु यिन् । दाक्पी लुङवा छ्याप्सी, पालज्योर, लोप्ज्युङ ल्यामु म्येतु ताङ स्योन्नो तिवाला लाकी कोकप ल्यामु मेतु तप्की ज्युकी ङिमाला पयुलकी स्योन्नु तिवा छिग्याल लुङवा लाकी थोकला ल्हाक्पा गलु थोङ्गी । मिमाङ्गला कोकप गोकी ताम तिराङ राङगी मिजी ल्यामु क्यानी क्योङ थुप्की । छिग्याल लुङ्वा ढोप मेलोक्पा मिन ति क्यासिनाङ लापु अनुभव तिवा राङगी लुङवाला राङ थोक थुप गोकी ।

युरोप शेर्पा संघकी श्यार्वी थोकला क्याउ लाका ताङ ल्यारिम ति काङ काङ यिन् ?

 दि छोक्पी छोक्पा गो छुने ज्युन खाक्छे क्यानी युरोपकी दाशा नाछोगला लोप्ज्युङ ताङ लागी रिम्बाला ज्युयी वाउ श्यार्वा तिवाला च्यिगढिल क्यानी कले खेलु मिमाङ्ग तिवाला पाल्ज्योरकी रोगराम तिवा कियी वान् वाई । दुकराङ क्यानी पयुलला श्यार्वा मिमाङ्ग तिवा ज्युयी वाउ दाशी सयोमकी ङ्याम्क्षा ताङ्गु ल्हाखाङ्ग ज्योङगु ताङ सायोमला कले खेलु श्यार्वा मिमाङ्ग तिवाला रोगराम क्यान वाई । दुकराङ क्यानी पयुलकी श्यार्वी छोक्पा नाछोग ताङ चिछोग नाङन्ये ज्याकु माग ताङ तिकी खाक्छे ल्हानी तुछो कुतुक कुतुकला रोगराम कियी वान् वाई ।

 छोक्पी ज्युकी ल्यारिम ति काङ काङ वाई ?

 दि छोक्पी छोक्पा गो छुवु पर्ला लाख ङान्ये गोमा क्यान वाई त दि लोला लाख खल्जिक क्योलु मिग्युल वाई दि मर्चा ति लो तक्पा हजार १२ की दरला पयुलला वतु तप्रुक पेजा तिवी लोप्ज्युङ्गकी थोकला रोगराम किरु थाक्च्योत् क्यान् वाई ।

 तन्दी तुछोला पयुल वोदेमकी कियी वाई स्युङकी वोदेम थाङपो सिने वोदेम ङिवा किरुकी ल्यारिम गोमा क्यान वाई । दि साने वोदेमला श्यार्वा ताङ ल्हाक्पा सिसिन ल्हाक्पा स्योनो तिवाला मत तेरुकी वाङक्षा न्ये पाङला वाई दि ला काङ सुङगी ?

 लुङवाला लो वाङ्गी ज्युकला साने वोदेम किरुला कोङफे थोम वाई । साने वोदेमकी ल्यारिम थाङपो छार्ने त वोदेमकी ल्यारिम ङिवा कोङफे तोङगुला पयुल स्युङ ताङ छ्याप्सी नाछोगकी गोठीत तिवा गोमा क्यान वाई । छिग्याल लुङवाला देनी वतु मिमाङ्ग तिवी राङगी युल ताङ ग्यालखाप यार्गे जोपला दाक्पी साङ साने वोदेमला छोक्स्यू लानी राङगी स्येमला गतु गोठीत याङना उमेद्धारीला – कुछाप ) ला राङगी खाक्छेन्बु मत तेरगोउ मताधिकारन्ये बन्चित ढो गोउ दुर्भाग्यकी ताम यिन् । छिग्यालला साङ पयुलकी छ्याप्सीकी छोक्पा तिवा गो चुन वाई । नरी छ्याप्सीत्की ल्यारिम तिवा गोढिग कियी वान् वाई । युरोपला साङ छ्याप्सीकी छोक्पा तिवा गो चुन वाई । पयुलन्ये छ्प्सीकी लागी यिगथोग खुन्ने हुङ्गु गोठीत तिवाला छिग्यालला वतु मिमाङ्ग तिवी छिग्याल लुङवान्ये राङ मत तेरी वाङक्षा थोप गोउ ताम गोमान्ये ज्युन ज्याकुराङ यिन् । ति क्यासिनाङ दि थोप माथुप वाई ति तप्की सेमला दुक्पा लान वाई ।

 त दाक्पु अराउराकी तिङस्योकला सङ ल्येपु तप्की आच्युकी छोकने सुङगोउ सुङ टोङ्गो तिवा वोसिन सुङनङसीन ला ।

 त तिङस्योकला श्यर्वा उजुनुप इजीनुम तेरीला काङ स्योप सिसिन श्यर्वा सिरुती गोमाला ति श्यारखुम्बुला तिरङ देकी सिने हाक को वोसिनङ त तुछो ग्युरीन गल्सिमा तन्दा दाक्पु कोले कोले क्यान याम्बुर तङ पयुलकी ज्येन जोङखा दुकराङ क्याने चिछोग लुङवा माङबोला टम्ने वेई । ति खला सङ तन्दी छुल्ला छिग्यालकी दासा माङबोला श्यर्वा तिवा माङबो लेम सिन वेई । ति तप्की दाक्पु श्यर्वा ति कनी गल्सिनङ दाक्पी पेजातिवाला श्यर्वी ताम लोपुला नासम तोङडो कि सिने तेरीला स्योई । दुकराङ क्याने श्यार्वी के, क्ष्यो, यार्गे जोप ताङ मिग्यूल खुन्ने गो छुवु छोक्पा तिवी श्यार्वी के, क्ष्यो, रिग्स्युङ यार्गे जोपकी मिग्युल चिछोग नाङला टोङगु कोतुरकी ल्यारिम तिवा गोढिग क्याने छोक्पा तिवा च्यिगढिल क्यानी गोमा कि थुप्सी तिराङ श्यार्वी चिछोग नाङला गो छुने वतु छोक्पा तिवी मिग्युल थोप्की त्ये नोकिनोक ।

लसे छिग्यालला ज्युने हेासिनाङ ङिरङताङमुला अराअुरा नाङसुङ थुजिक्षे

लसे अच्युलासङ ङेकी क्षयेाक्ने थुजिक्षे ।