चिसाङ शेर्पा खोटाङ, खोटाङको दिप्रुङ चुइचुम्मा गाउँपालिकाले तीन जनालाई क्वारेन्टाइनमा राखेको भोलीपल्ट थप दुईजनालाई क्वारेन्टाइनमा राखेको छ । आज (बिहीबार) दुई जनालाई क्वारेन्टाइनमा राखिएको दिप्रङ चुइचुम्मा गाउँपालिका अध्यक्ष भुपेन्द्र राईले बताए ।

क्वारेन्टाइनमा राखिनेमा छोरम्बुका ३१ वर्षीय परियार, ३८ वर्षीय तामाङ थरका रहेका छन् । उनीहरु तीनदिन अघि भारतको सिक्किमबाट छोरम्बु आएका हुन् । यसअघि भारतको वेष्ट बंगालबाट आएका याम्खाका वस्नेत थरका २२ वर्षीय, भारतको मेघालयबाट आएका याम्खाकै राई थरका ४७ वर्षीय र साउदीबाट आएका विक थरका ३० वर्षीय पुरुषलाई हिजोबाट क्वारेन्टाइनमा राखिएको छ ।

उनीहरुलाई स्वास्थ्य चौकी याम्खामा निर्माण गरिएको ४० वेडको क्वारेन्टाइनमा स्वास्थ्यकर्मीको निगरानीमा राखिएको छ । विश्वभरी महामारीको रुपमा फैलिएको कोरोना भाइरस (कोभिड–१९) जोखिमलाई ध्यानमा राखेर गाउँपालिकाले वैदेशिक रोजगारी र जिल्ला बाहिरबाट आएका व्यक्तिहरुलाई पहिचान गरि क्वारेन्टाइनमा राखेको होे । क्वारेन्टाइनमा बसेकाहरुको लागि गाउँपालिकाले खानपिनको व्यवस्था मिलाएको छ ।

क्वारेन्टाइनमा आवश्यक पर्ने व्यवस्था मिलाएर २४ सै घण्टा स्वास्थ्यकर्मीको व्यवस्था मिलाइएको छ । पालिका प्रवेश गर्ने ४ वटा नाकाहरुमा पनि हेल्थ डेस्क स्थापना गरेर कडाइका साथ चेकजाँच भइरहेको जनाइएको छ ।
२०७६ चैत्र १३ गते अपरान्ह ३: ३६ मा प्रकाशित