सोनाम याङ्जी शेर्पा ,काठमान्डैा

याम्बु श्यार्वी लोप्टुक छोक्पी ल्येताक वतु दुक याङना झण्डा जाम्बुलिङकी तेरी सिना थेन्बु च्योमोलोङ्गमी चेला क्योल थुप्वेत् ।

श्यार्वी चिछोग नाङला ल्यारिम नाछोग गोढिग कियी वाउ श्यार्वी छोक्पा नेपाल शेर्पा बिद्यार्थी संघकी झण्डा पासाङ्ग ग्याल्जेन श्यार्वी रोगरमला च्योमोलोङ्गमाला क्योल थुपु यिन् । श्यार्वी चिछोग नाङला गोमाला मञ्च जोनी लाका कियी वाउ छोक्पा ज्युकी ङिमाला दि ल्यारिम तिवा माङ ग्याक्षे जोनी गोमा किरुला संघला ग्र्युच्यो जोउ यिन् ।

पासाङ्ग ग्याल्जेन श्यार्वी खर्चे २०१७ मे २९ की ङिन टोप्ला छुत्चो ठुग ला च्योमोलोङ्गमा थारु मुला राङ याम्बु श्यार्वी लोप्ठुक छोक्पी तच्र्यो साङ च्योमोलोङ्गमाला लेपु यिन् । लो सुम गोमान्ये ज्युन युल्कोर ताङ काङ्ग्री ज्येकु लाका कियी वाउ पासाङ ग्याल्जेन तन्दा सग थेङमा ङि च्योमोलोङ्गमा जेन् सिन्दु यिन् । च्योमोलोङ्गमा थार्नी याम्बु कुङ फेउ खोङला याम्बु श्यार्वी लोप्टुक छोक्पी चिख्याप ताङ कुछाप तिवा नम्थाङ ला राङ ल्येम्ने च्योन्पालेक्सो पुलु यिन् । थेङमा ङि सेग च्योमोलोङ्गमा थरु श्यार्व थाल्माला २०१६ मे २० ला छुजे टुक ताङ छेकाला थरु यिन् ।

सेभेन समिट टे«क्सकी रोगरामला काङग्री ज्येकु लाका कियी वाउ श्यार्वा च्योमोलोङ्गमा ज्येकुला तलिङ खर्चे अप्रिल ७ ला याम्बु न्ये काङग्रीकी छ्योगला फेवु याम्बु श्यार्वी लोप्टुक छोक्पी छोग्मी आङ कामी श्यार्वी सुङसुङ । लोप्ज्योङ, चिछोग, ताङ रिग्स्युङकी थोकला ल्यारिम तिवा गोमा क्यान वतु छोक्पी तन्दा सगला जोङखा नाछोगला साङ दि छोक्पा चूँ वाई ।

चिछोग नाङला छासेराङ खाक्छेन्बु लोग्यु वतु दि छोक्पाला ज्युकथामा सागला साङ दुकराङ क्येई ज्योकुला छोक्पी ल्येताक वतु दतरकी छासेराङ्ग खाक्छेन्बु लेगेन ज्येकु तप्की दुक च्योमोलोङ्गमा सग क्योलुला पासाङ्ग ग्यल्जेन श्यार्वी हुताक क्यानी क्यालु छोक्पी चिख्याप ङिमा दोर्जी श्यार्वी सुङसुङ ।

छोक्पी दि सिसिन लो वाङ्गी गोमान्ये ज्युन श्यार्वी लोप्टा तिवी वाङक्षा, थोप्ताङकी कोर्लासाङ ल्यारिम नाछोक तिवा गोटिग कियी वान् वाई ।