चिसाङ शेर्पा खोटाङ,
खोटाङमा ‘अन्तर पालिका स्तरिय पुरुष भलिवल प्रतियोगिता’ हुने भएको छ । भलिवल खेलको बिकास गरी उच्च स्तरको खेलाडी उत्पादन तथा भलिवल खेललाई व्यवसायिकता दिने उद्देश्यले मदन भण्डारी स्पोट्स एकेडेमी खोटाङले पाँच दिवसीय प्रतियोगिता गराउने भएको हो ।

प्रतियोगिता पुस १५ गतेदेखी १९ गतेसम्म दिक्तेल रुपाकोट मझुवागढी नगरपालिका–१४ बुईपाको खेलमैदानमा हुने मंगलबार पत्रकार सम्मेलनमा जानकारी दिएको छ । प्रतियोगितामा एक पालिकाबाट दुई टिमले सहभागिता जनाउन पाउने र टिम दर्ता ५ हजार ५ सय ५५ रुपैयाँ लाग्ने बताइएको छ । भलिवल खेलमा प्रथम हुने टिमले नगद १ लाख ११ हजार १११, दोस्रो टिमले ७७ हजार ७ सय ७७, तेस्रो टिमले ५५ हजार ५ सय ५५ र चौथो टिमले ३३ हजार ३ सय ३३ रुपैयाँका साथमा ट्रफि, मेडल र प्रमाणपत्र प्राप्त गर्ने एकेडेमीका सचिव रोशन राईले बताए । विधागत उत्कृष्ट खेलाडीहरुलाई ट्रफि, मेडल, प्रमाणपत्र र सम्मान गरिनेछ ।

प्रतियोगिताको माध्यमद्धारा जिल्लाको पर्यटकीय स्थलहरुको प्रचारप्रसार गरी आन्तरिक र वाह्य पर्यटक भित्राई जिल्लाको पर्यटन तथा व्यावसाय प्रवद्र्धन गर्ने लक्ष्य रहेको एकेडेमीका अध्यक्ष दिनेश साम्पाङले बताए । प्रतियोगितामा प्रमुख अतिथि राष्ट्रिय खेलकुद परिषदका सदस्य सचिव रमेश कुमार सिलवाल रहने अध्यक्ष साम्पाङले बताए । प्रतियोगिता अवधिमा अनुमानित १३ लाख खर्च हुने बताइएको छ ।
२०७६ पुस १ गते साँझ ७ :४५ बजे प्रकाशित