समायोजन खबर खोटाङ,
जिल्ला समन्वय समिति खोटाङले पहिरोले घर पुर्दा एकै परिवारका तीन जनाको मृत्यु भएको घट्नाप्रति दुःख व्यक्त गरेको छ । गत असार २७ गते बिहान घरभन्दा माथिबाट खसेको पहिरोले घर पुर्दा खोटेहाङ गाउँपालिका–३ सावाकहटरेकी रेखा राई, उनका ३ वर्षका छोरा रोमन राई र ७ महिनाका छोरा रोजन राईको मृत्यु भएको घट्नाप्रति समन्वय समितिले दुःख व्यक्त गरेको हो । जिल्ला समन्वय समित खोटाङका प्रमुख बबी चाम्लिङले मंगलबार साँझ प्रेस विज्ञाप्ती जारी गर्दै परिवार तथा आफन्तजनमा धैर्य धारणको कामना गरेका छन् । विज्ञाप्तीमा पहिरोले पुर्दा घाईते भएका रेखाकी श्रीमान बिष्णु राईको स्वास्थ्य लाभको कामना गरिएको छ ।

समन्वय समितिले विपत्तीको समयमा आवश्यक खोज तथा उद्धार गरी राहत वितरणमा खटिएका स्थानीय तह, प्रशासन, सुरक्षाकर्मी, संघसंस्था तथा नागरिक समाजलाई धन्यवाद ज्ञापन गर्दै आगामी दिनमा पनि विपद न्यूनीकरणका उपाय अलवम्बन गर्न र सहयोगका लागि तयारी अवस्थामा रहन आग्रह गरेको छ । असार २३ गते बेलुका देखि परेको वर्षाका कारण जिल्लामा ठूलो मात्रामा धनजनको क्षती भएको छ ।
२०७६ साउन २ गते दिउँसो २ :५९ मा प्रकाशित