समायोजन खबर खोटाङ,
नेपाली कांग्रेस नेता उदय शम्सेर राणाले वर्तमान प्रधानमन्त्री राजाभन्दा अहम र घमण्डी देखिएको बताएका छन् । खोटाङमा बुधबार कांग्रेसको राष्ट्रिय जागरण अभियान उद्घाटन गर्दै कांग्रेस नेता राणाले वर्तमान प्रधानमन्त्री ओली राजाभन्दा अधिनायकवादी बनेको आरोप लगाएका हुन् । ‘राजा बिरेन्द्रमा पनि केपी ओलीको अहम र घमण्ड थिएन, राजा महेन्द्रमा पनि यो किसिमको अहम र घमण्ड थिएन,’ राणाले भने, ‘मंगलबार त्यो किसिमको घमण्ड लिएर संसदमा बोलियो । तिमी विपक्षी दल केही होईन, मैले जे भनेँ–भनेँ भन्ने दम्भ देखाइयो ।’ नेता राणाले राष्ट्रपतिले ‘मेरो सरकार’ भन्दा कांग्रेस मात्र नभएर दुनियाँ हाँसेको बताए ।

केन्द्रिय प्रतिनिधिकारुपमा खोटाङ आएका राणाले सरकारले बुढीगण्डकीको काम बिना प्रतिष्पर्धा चिनिया कम्पनीलाई दिएको, ३३ केजी सुन सामसुम पारिएको, वाईडबडीमा भएको अनियमिततामा संलग्नलाई संरक्षण गरिएको बताए । ‘जुन कम्पनीले नेपालकै विभिन्न योजना डुबाईसकेको छ, त्यही कम्पनीलाई बिना प्रतिष्पर्धा बुढी गण्डकीको काम जिम्मा लगाइएको छ, वाईडबडीमा उस्तै समस्या छ,’ पुर्वअर्थ राज्यमन्त्री राणाले भने, ‘३३ किलो सुन कता हरायो ? जनताबाट उठेको कुरालाई सरकारले हाउसमा पनि अत्यान्त हल्का किमिसले लिएको छ ।’

नेता राणाले कांग्रेसको नेतृत्वमा मुलुकमा संबिधान निर्माण, स्थानीय तहको निर्वाचन लगायतका ऐतिहासिक काम भए पनि जनतालाई बुझाउन नसकिएको बताए । ‘कम्यूनिष्टले पित्तललाई सुन बनाएर बेचिरहेको छ, तर कांग्रेसले सुनलाई बेच्न सकेको छैन,’ राणाले भने, ‘कांग्रेसले आफुले गरेका राम्रो कामको प्रचार गर्न सकेन । गुट–उपगुटका समस्या मात्र पव्लिकमा पु-याइयो ।’ कार्यक्रममा कांग्रेस महासमिति सदस्य बिष्णुकुमार राई, महासमिति सदस्य सरस्वती बजिमय, पार्टी सभापति नरशे कुमार श्रेष्ठ लगायतले सम्बोधन गरेका थिए ।

यस्तै, राष्ट्रिय जागरण अभियान उद्घाटन सत्रमा पाँच जना कांग्रेसमा आएका छन् । साविक सङघीय समाजवादी फोरम खोटाङका जिल्ला सदस्य भीम केशर राई, सङघीयकै नेता कैलाश राई र नेकपाका गोपीमाया आचार्य, सिताराम दर्जी तथा सोम मगर कांग्रेसमा प्रवेश गरेका हुन् ।
२०७६ बैशाख २५ गते साँझ ६ :२१ मा प्रकाशित