३ चैत , काठमाडौं । सरकारको नियर्णय विरुद्ध अदालतमा पुगेको आइजीपी नियुक्ति प्रकरणमा आजबाट अन्तिम सुनुवाइ सुरु हुँदैछ ।

फागुन १ गते मन्त्रीपरिषदको वैठकले जयबहादुर चन्दलाई आइजीपी बनाउने निर्णय गरे पनि अदालतले अन्तरिम आदेश दिँदै रोकेको थियो ।
प्रधानन्यायाधीश सुशीला कार्कीको एकल इजलासले आइजीपी नियुक्ति यथास्थानमा राख्न दिएको अन्तरिम आदेशलाई गत फागुन १८ गतेको निरन्तरता दिएको थियो ।
जयबहादुर चन्दलाई आइजीपी बनाउनुको लिखित कारण माग गरे पनि सरका्ले पेश नगरे पछि अन्तरिम आदेशले निरन्तरता पाएको थियो ।
पछिल्लो आदेश पछि प्रधानमन्त्री प्रचण्डले अदालतलाई लिखित जवाफ पठाइसकेका छन् । प्रधानमन्त्रीको जवाफ पछि अदालतले बिहीबारबाट अन्तिम सुनुवाई सुरु गर्न लागेको हो ।
अधिवक्ता कपिलदेव ढकाल र डीआइजी नवराज सिलवालले दिएको रिटमा जयबहादुर चन्दलाई आइजीपीमा सदर गर्ने कि नगर्ने भन्ने अन्तिम सुनुवाई हुनेछ ।
बिहीबार अन्तिम सुनुवाईका लागि न्यायाधीश तेजबहादुर केसी र इश्वरप्रसाद खतिवडाको इजलाशमा मुद्धा पुगेको छ ।
बिहीबारबाट दुवै पक्षको बहस सुरु हुनेछ । बहस सकिएपछि चन्दलाई आइजीपी कायम गर्ने कि नगर्ने भन्ने टुंगो लाग्नेछ ।