चिसाङ शेर्पा खोटाङ,
मानसिक सन्तुलन गुमाएकी छितापोखरीकी रमिला तामाङको काठमाण्डौमा उपचार भईरहेको छ । बिगत दुई वर्षदेखी मानसिक रोगकी शिकार बनेकी दिप्रुङ चुईचुम्मा गाउँपालिका–६ छितापोखरी बास्थलाकी स्थानीय ३३ वर्षीया तामाङले गाउँपालिकाको आर्थिक सहयोगमा उपचार गराईरहेकी हुन् ।

चारैतिर जाली र काठको कोठा बनाई दिशापिसाब एकै ठाउँमा गर्नेगरी बन्धक बनाएको उनको फोटो सामाजिक सञ्जालमा सार्वजनिक भएपछि गत मंगलबार (पुस ३) दिप्रुङ चुईचुम्मा गाउँपालिका प्रमुख भुपेन्द्र राईको नेतृत्वमा उद्धारगरी गाउँपालिकाले १० हजार आर्थिक सहयोग गरेर सोही दिन थप उपचारका लागि राजधानी पठाइएको रमिलाको मानसिक अस्पताल पाटनमा उपचार भईरहेको उनका श्रीमान मनिकुमार तामाङले जानकारी दिए ।

बेड अभावका कारण चिकित्सकको चेकजाँचपछि औषधी सेवन गर्दै आएकी रमिलालाई शुक्रबारदेखी बेड भर्ना गरी नियमित चिकित्सकको निगरानीमा राखिएको छ । कराउने, चिच्याउने तथा अपशब्द प्रयोग गर्ने समस्या क्रमिक रुपमा सुधार हुदैं आएको छ । मानसिक चिन्ता धेरै भएकाले रमिलाको टाउकोमा केही समस्या देखिएको चिकित्सकलाई उद्धृत गर्दै उनका श्रीमानले बताएका छन् । नियमित औषधी खाएमा उक्त समस्या हल भएर जाने चिकित्सकले बताएका छन् । उनको उपचारका लागि हालसम्म गाउँपालिकाले २५ हजार आर्थिक सहयोग गरिसकेको छ ।
२०७५ पुस ७ गते बिहान ९ : ०७ मा प्रकाशित