समायोजन खबर खोटाङ,
प्रदेश नम्बर १ का सामाजिक विकासमन्त्री जीवन घिमिरेले पहिरन, सोसल मिडिया र मादक पदार्थ सेवनका कारण महिला हिंसा हुने गरेको बताएका छन् । लैंगिक हिंसा विरुद्धको १६ दिने अभियानकाक्रममा जिल्ला समन्वय समिति खोटाङ र सामाजिक विकास मन्त्रालय प्रदेश नम्बर १ ले सोमबार दिक्तेलमा आयोजना गरेको कार्यक्रमलाई सम्बोधन गर्दै मन्त्री घिमिरेले भड्किलो पहिरन, सामाजिक सञ्जालको दुरुपयोग र मादक पदार्थ सेवनका कारण महिलामाथि हिंसा भइरहेको बताएका हुन् । ‘महिलाको पहिरन, सोसल मिडिया र पादक पदार्थ सेवन लगायतका कारण महिलामाथि हिंसा भएको देखिन्छ,’ सामाजिक बिकास मन्त्री घिमिरेले भने, ‘मानवीय त्रुटीका कारणले हुने महिला हिंसाका बारेमा सामाजिक जागरण आवश्यक देखिएको छ ।’

मन्त्री घिमिरेले देश नयाँ संरचनामा गए लगत्तै कानूनी संक्रमण जारी रहेकाले कतिपय महिला हिंसाका पीडकले प्रश्रय पाइरहेको उल्लेख गरे । उनले त्रि–धार्मिकस्थल हलेसीको विकास, जिल्ला अस्पतालको स्तरोन्नति, सामुदायिक विद्यालय सुधार, सडक तथा खेल मैदान निर्माण लगायतका क्षेत्रमा प्रदेश सरकारले बजेट बिनियोजन गरेको जानकारी दिए ।
२०७५ मंसिर १७ गते राती ८ :३८ मा प्रकाशित