समायोजन खबर खोटाङ, खोटाङको हलेसी तुवाचुङ नगरपालिकाका ११६ जना भूमिहीन सुकुम्बासी, दलित र अव्यवस्थित बसोबासीलाई निस्सा वितरण गरिएको छ।

भूमि प्राप्तीका लागि परेको निवेदनलाई लगत प्रणालीमा प्रविष्ट गर्ने काम सकिएपछि मंगलबार नगरपालिकामा कार्यक्रम गरी निस्सा वितरण गरिएको हो।

भूमि समस्या समाधान आयोग खोटाङका अध्यक्ष निर्मल राई, हलेसी तुवाचुङ नगरपालिकाका मेयर बिमला राई, उपमेयर रमेशकुमार राउतले लाभग्राहीलाई निस्सा वितरण गरेका हुन्।

निस्सा पाएका लाभग्राहीको नेपाल अधिराज्यभरका मालपोत कार्यालयमा तीनपुस्ते नामावली जाँच गर्दा कुनै पनि ठाउँमा जग्गा नदेखिएमा प्रक्रिया पुगेपछि उहाँहरुले जग्गा पाउने भूमि समस्या समाधान आयोगका अध्यक्ष राईले बताउनुभयो।