समायोजन खबर खोटाङ, आमाबुबा गुमाएका केपिलासगढी गाउँपालिका–१ फेदी चित्रेका बालबालिकालाई केपिलासगढी सचेत युवा समुहले आर्थिकसहित खाद्यान्न र लत्ताकपडा सहयोग गरेको छ।

केपिलासगढी सचेत युवा समुहले बिहीबार घरैमा पुगेर बालबालिकाका लागि ५३ हजार आर्थिक सहयोग गरेको हो।

५३ हजारमध्येमा सात हजार नौ सयको लत्ताकपडा, सिरक, डस्ना, सिरानी र ११ हजार ६४० रुपैयाँको खाद्यान्न खरीद गरेर उक्त सामाग्रीहरुसहित ३३ हजार ४६० रुपैयाँ नगद सहयोग गरिएको सचेत युवा समुहका प्रतिनिधि पवन श्रेष्ठले बताए।

बुबा जबरधन राईको भतिजसँग झगडा हुँदा ज्यान गएको र आमाको पनि निधन भएपछि पाँचजना बालबालिकाका आमाबुबा विहीन भएका हुन्।

पाँचजना बालबालिकामा चारजना विद्यालय जाने गरेका छन्। उनीहरुलाई दिदी मात्रिकला राईले लालनपालन गरिरहेको फेदीका वडाध्यक्ष नीरकुमार राईले बताए। वडाध्यक्ष राईका अनुसार मात्रिकला पनि शाररिक रुपले अशक्त छिन्।