समायोजन खबर खोटाङ, जनता समाजवादी पार्टी(अशोक राई नेतृत्वको) खोटाङ जिल्ला कमिटी अध्यक्षमा निर्मल राई चयन भएका छन्।

शनिबार जिल्ला समन्वय समितिको हलमा भएको जिल्ला भेलाले दिक्तेल रुपाकोट मझुवागढी नगरपालिका–५ लफ्याङका राईलाई सर्वसहमत अध्यक्षमा चयन गरेको हो। राई २०७४ सालको स्थानीय निर्वाचनमा तत्कालिन जसपा नेपालबाट लफयाङको वडाध्यक्ष भएका थिए।

राईको अध्यक्षतामा १११ सदस्यीय जसपा जिल्ला कमिटी गठन गरिएको छ। जिल्ला कमिटीको उपाध्यक्षमा गुरुराज राई, नैनकला राई, सचिवमा विरेन्द्र कुमार दर्नाल, सह सचिवमा टिकाराम राई, शान्तिकला राई, प्रितिराज राई र कोषाध्यक्षमा गन्धमान राई चयन भएका छन्।

जसपाका केन्द्रीय सदस्य देवराज राई, रमेश राई, सन बहादुर राई, संघीय परिषद सदस्य राकेश राई र समाजवादी विधार्थी युनियनका केन्द्रीय महासचिव प्रकाश चाम्लिङ रार्ईको उपस्थितीमा जिल्ला कमिटी गठन भएको हो।
उपेन्द्र यादव नेतृत्वको जसपा नेपाल पार्टी बैशाख २३ गते फुटेपछि अशोक राईको नेतृत्वमा जसपा बनेको हो।