समायोजन खबर खोटाङ, खोटाङको हलेसी तुवाचुङ नगरपालिका–९ सल्लेका डढेलो पीडितलाई राहत प्रदान गरिएको छ।

बैशाख १४ गते सल्लेपोखरी सामुदायिक वनमा लागेको आगो हावाहुरीका कारण अनियन्त्रित भई बस्ती पस्दा घर तथा मतान जलेर पीडित बनेका छ परिवारलाई शनिवार राहत प्रदान गरिएको हो।

घर जलेका झन बहादुर थापा मगर, इन्द्र बहादुर थापा, गोपाल बहादुर थापा मगर, मदन बहादुर थापा मगर, भेष बहादुर राना मगर र खगेन्द्र बिकलाई राहत प्रदान गरिएको सल्लेका वडा सचिव चित्र राना मगरले जानकारी दिए।
मगरका अनुसार पीडितहरुलाई हलेसी तुवाचुङ नगरपालिकाको तर्फबाट त्रिपाल र ब्ल्याङकेट एक–एकवटा, ३० केजी चामल एक–एक बोरा प्रदान गरिएको छ।

वडा कार्यालय सल्लेको तर्फबाट छ जनालाई जनही चामल ३० केजी, दाल दुई केजी, चिनी एक केजी, चिउरा दुई केजी, आलु दुई केजी, खानेतेल दुई पोका, बेसार एक पोका, मसला २०० ग्राम र प्रत्येकलाई एक–एकवटा त्रिपाल वितरण गरिएको छ।

आगलागीबाट गोठ जलेका योग बहादुर मगरलाई नगर र वडा कार्यालयको तर्फबाट एक–एकवटा त्रिपाल वितरण गरिएको छ। पीडितहरुलाई हलेसी तुवाचुङ नगरपालिकाका मेयर बिमला राई र सल्लेका वडाध्यक्ष काशीराज राईले राहत वितरण गरेका थिए।